Venesýelada Madýronyń kúzetine jaýapty áskerı qyzmetker otstavkaǵa ketti
ASTANA. KAZINFORM — Venesýelada AQSh-tyń áskerı aralasýy kezinde qajetti qaýipsizdik sharalaryn qamtamasyz ete almaǵany úshin prezıdent Nıkolas Madýronyń kúzet qyzmetine jaýapty general-maıor Haver Markano Tabata qyzmetinen bosatyldy, dep habarlaıdy Anadoly.
Venesýeladaǵy ýaqytsha prezıdent mindetin atqarýshy Delsı Rodrıges prezıdent Nıkolas Madýronyń kúzet bólimshesine jaýapty bolǵa general-maıor Haver Markano Tabatany qyzmetinen alyp tastady. Onyń ornyna Rodrıges general Gýstavo Gonsales Lopesti taǵaıyndady.
Ulttyq BAQ málimetteri boıynsha, Rodrıges Tabatany AQSh áskerı aralasýy kezinde qaýipsizdiktiń jetkilikti sharalaryn qoldanbaǵany úshin qyzmetinen bosatqan.
Rodrıges Lopesti prezıdenttiń Qurmet gvardııasyn basqarýshy jáne Bas áskerı kontrbarlaý basqarmasy (DGCIM) bastyǵy etip taǵaıyndady.
Kommýnıkatsııalar mınıstri Freddı Nanes áleýmettik jelilerde Lopestiń Tabata ornyna osy laýazymdarǵa kelgenin habarlady.
Nanestiń aıtýynsha, bul taǵaıyndaýlar azamattardyń qaýipsizdigin qamtamasyz etýge baǵyttalǵan ınstıtýttyq nyǵaıtý jáne bıliktiń turaqtylyǵyn qamtamasyz etýdiń bir bóligi bolyp esepteledi.
Jergilikti BAQ málimetteri boıynsha, bul kadrlyq sheshim Venesýeladaǵy bılik tepe-teńdigi turǵysynan sheshýshi mánge ıe.
Madýro AQSh tarapynan tutqyndalǵannan keıin, eldiń Qaýipsizdik keńesi qaıta uıymdastyrý protsesinen ótip jatyr, al joǵarǵy komandalyq quramda mańyzdy ózgerister jasalǵan.
Sarapshylar Rodrıgestiń ýaqytsha prezıdent retinde óziniń bıligin nyǵaıtý jáne el ishindegi kúsh qurylymdaryna tolyq baqylaý ornatýǵa umtylyp jatqanyn atap kórsetedi.
General Lopes kim?
Delsı Rodrıges taǵaıyndaǵan general Gýstavo Gonsales Lopes 2019–2024 jyldary Venesýela barlaý qyzmetin (SEBIN) basqarǵan. Buryn ol Іshki ister jáne ádilet mınıstri bolǵan, sondaı-aq Nıkolas Madýronyń bılik júıesindegi negizgi kúshtik tulǵalardyń biri sanalǵan.
Lopes eldiń kúsh qurylymdarynyń eń yqpaldy ókilderiniń biri bolyp esepteledi. Onyń joǵary laýazymǵa oralýy Venesýela ishinde de, shetelde de úlken rezonans týǵyzdy.
SEBIN basqarǵan kezeńinde Lopestiń qyzmeti halyqaralyq jáne adam quqyqtaryn qorǵaý uıymdary tarapynan birneshe ret synǵa ushyrady. Oǵan adam quqyqtaryn buzýǵa qatysy bar dep aıyp taǵylyp, AQSh pen Eýropalyq Odaq tarapynan sanktsııalar qoldanyldy. General Lopes AQSh Qarjy mınıstrliginiń sanktsııalyq tizimine de engizilgen.
Aıta keteıik, arnaıy operatsııa barysynda Venesýela prezıdenti Nıkolas Madýro men onyń jubaıy AQSh-qa jetkizilip, tutqyndalǵan. Madýro Nıý-Iorkte esirtki saýdasy aıyby boıynsha sot aldynda jaýap berdi. Madýro men onyń jubaıy alǵashqy sot otyrysynda ózin kináli dep tanymaıtyndaryn málimdedi.
Venesýelanyń burynǵy basshysy Nıkolas Madýro qamaýǵa alynǵan sátte kıgen Nike Tech Fleece sporttyq kostıými jahandyq sán trendine aınaldy.