Venesýelada bosatylǵan tutqyndar sany 900 adamǵa jýyqtady
ASTANA. KAZINFORM — Venesýela bıligi 2025 jylǵy jeltoqsan aıynan beri túrmelerden 897 adamdy, onyń ishinde saıası tutqyndardy da bosatty. Bul týraly respýblıka ishki ister mınıstri Dıosdado Kabelo brıfıng barysynda málimdedi, dep habarlaıdy Anadolý.
Onyń aıtýynsha, qazirgi ýaqytta el túrmelerinde birde-bir oppozıtsııalyq qaıratker qalmaǵan.
Bosatylǵannan keıin kóp uzamaı oppozıtsııalyq saıasatker Hýan Pablo Gýanıpanyń qaıta ustalýyna qatysty qoıylǵan suraqqa jaýap bergen Dıosdado Kabelo:
«Keıbir saıasatkerler aqymaqtyqpen ózderine bári ruqsat dep oılady, elde tártipsizdik týdyrýǵa tyrysty, sol arqyly bosatylý sharttaryn buzdy», dep málimdedi.
Venesýeladaǵy tutqyndar
Nıkolas Madýronyń bıligi kezeńinde Venesýela túrmelerinde terrorızm men tyńshylyqqa qatysty aıyptarmen ustalǵan shetel azamattary da bolǵan. Bul másele Karakas pen AQSh arasyndaǵy kelissózder aıasynda birneshe ret kóterilgen.
AQSh prezıdenti Donald Tramp saıası tutqyndardy bosatý maqsatynda birqatar qadamdar jasap, ótken jyly osy bastamalar sheńberinde Venesýelaǵa óziniń arnaıy ókili Rıchard Grenelldi jibergen bolatyn. Jazǵa qaraı 20-dan astam ustalǵan amerıkalyq azamat bostandyqqa shyqty.
Alaıda keıingi aılarda Tramp ákimshiligi tarapynan Venesýela bıligine áskerı jáne ekonomıkalyq qysymnyń kúsheıýi aıasynda elde AQSh-tyń taǵy birneshe azamaty ustaldy.
Eske sala ketsek, AQSh 7 jyldan keıin Venesýeladaǵy dıplomatııalyq mıssııasyn qaıta ashty.