Venesýelada bolǵan eki joıqyn jer silkinisinen qaza tapqandar sany 3,3 myńnan asty
ASTANA. KAZINFORM — 24 maýsymda Venesýelada bolǵan eki joıqyn jer silkinisi saldarynan qaza tapqandar sany 3 342 adamǵa jetti, dep habarlaıdy Anadoly.
Bul týraly Venesýela Ulttyq assambleıasynyń tóraǵasy Horhe Rodrıges áleýmettik jelidegi paraqshasynda tabıǵı apattyń saldaryna qatysty jańartylǵan málimetterdi jarııalady.
Onyń aıtýynsha, 16 740 adam jaraqat alǵan.
Sondaı-aq Rodrıgestiń málimetinshe, qutqarýshylar úıindi astynan 6 462 adamdy aman alyp shyqqan. Al 17 345 adam baspanasyz qalǵan, olar úshin 79 ýaqytsha ornalastyrý ortalyǵy ashyldy.
Ol osy ýaqytqa deıin 86 794 otbasyǵa kómek kórsetilgenin aıtty. Zardap shekkenderge 9 585 tonna azyq-túlik pen 669 008 lıtr aýyz sý jetkizilgen.
Rodrıgestiń sózinshe, jer silkinisiniń saldaryn joıý jumystaryna 29 567 áskerı qyzmetshi men polıtsııa qyzmetkeri, sondaı-aq 27 482 erikti jumyldyrylǵan.
Jergilikti buqaralyq aqparat quraldarynyń habarlaýynsha, bılik joǵalǵan adamdar týraly aqparat qabyldaý úshin arnaıy telefon jelisi men tsıfrlyq platformany iske qosty. Alaıda ázirge iz-túzsiz joǵalǵandar sany týraly resmı málimet jarııalanǵan joq.
Sonymen qatar joǵalǵan adamdardy izdeý úshin qurylǵan «Venesýladaǵy jer silkinisinen joǵalǵandar» (Desaparecidos Terremoto Venezuela) azamattyq bastamasynyń saıtynda búgingi kúnge deıin 31 myńnan astam ótinish tirkelgen.
AQSh Geologııalyq qyzmetiniń (USGS) deregine sáıkes, 24 maýsymda Venesýelada araǵa 39 sekýnd salyp, magnıtýdasy 7,2 jáne 7,5 bolatyn eki jer silkinisi bolǵan.
BUU Damý baǵdarlamasy (UNDP) 26 maýsymda jer silkinisterinen kelgen tikeleı materıaldyq shyǵyndy 6,7 mıllıard dollar dep baǵalady.
Elde izdestirý-qutqarý jumystary áli de jalǵasyp jatyr. Mamandar qaza tapqandar men zardap shekkender sanynyń áli de artýy múmkin ekenin joqqa shyǵarmaıdy.
Osydan buryn Venesýeladaǵy tabıǵı apattan qaza tapqandar sany 3000-ǵa jýyqtaǵanyn jazǵanbyz.
