Venesýela jaǵalaýynda taǵy da jer silkindi
ASTANA. KAZINFORM – Venesýelada jergilikti ýaqytpen tańǵy saǵat 07:00-de magnıtýdasy 4,6 bolatyn taǵy bir jer silkinisi tirkeldi. Jerasty dúmpýleri Karakas pen La-Gýaıra qalalarynda anyq sezildi, dep habarlaıdy Euronews.
Bul jer silkinisi eldiń soltústiginde bolǵan joıqyn zilzaladan nebári bes kún ótken soń tirkeldi. 24 maýsymda magnıtýdasy 7,2 jáne 7,5 bolatyn eki jer silkinisi saldarynan eldiń soltústik óńirleri qatty zardap shegip, keminde 1 450 adam qaza tapqan edi. Bul joly da Karakas pen La-Gýaıra qalalary jer asty dúmpýlerin sezindi.
Jańa jer silkinisinen keıin úıleri aman qalǵan turǵyndar qaýiptenip, syrtqa júgirip shyqty. Jer silkinisiniń oshaǵy 2,9 shaqyrym tereńdikte ornalasqan. Epıtsentri 24 maýsymdaǵy joıqyn zilzaladan eń kóp zardap shekken La-Gýaıra qalasynyń shyǵysynan 10 shaqyrym jerde bolǵan.
Sońǵy birneshe saǵat ishinde 400-den astam aftershok tirkeldi. Seısmıkalyq belsendilikke baılanysty eldiń birqatar óńirinde, ásirese astanasy Karakasta tabıǵı gaz berý áli de toqtatylyp tur.
Іzdestirý-qutqarý jumystary jalǵasyp jatqan kezde prezıdent mindetin atqarýshy Delsı Rodrıges baspanasyz qalǵan turǵyndarǵa kómek kórsetý josparyn jarııalady.
Venesýelalyq jáne halyqaralyq qutqarýshylar negizinen eldiń soltústigindegi Karakaspen kórshiles ornalasqan jaǵalaýdaǵy La-Gýaıra shtatyndaǵy qıraǵan ǵımarattardyń úıindilerin tazartý jumystaryn jalǵastyryp jatyr.
Aıta keteıik, Venesýeladaǵy jer silkinisi saldarynan qaza tapqandar sany 1450-ge jetkenin jazdyq.
