Venesýela úkimeti 60 kúnge tótenshe ekonomıkalyq jaǵdaı engizdi
ASTANA. Qazaqparat - Venesýela úkimeti 60 kúnge tótenshe ekonomıkalyq jaǵdaı engizdi, dep habarlady www.24.kz.
Mundaı tártip el prezıdenti Nıkolas Madýronyń ókilettiligin keńeıte túspek. ıAǵnı negizgi sheshim memleket basshysynyń jarlyǵymen qabyldanatyn bolady. Sonymen qatar tótenshe ekonomıkalyq jaǵdaıda salyq kólemi artyp, bıznes pen ónerkásip salasynda memlekettik baqylaý kúsheımek. Ótken jyldyń jeltoqsanynda qazirgi prezıdent basqaratyn Birtutas sotsıalıstik partııa parlament saılaýynda oppozıtsııalyq kúshterden oısyraı utylǵan bolatyn.
Aıta ketken jón, Venesýela iri munaı qoryna ıe. Biraq sońǵy bir jarym jylda «qara altyn» baǵasynyń tómendeýi munaı eksportynan el bıýdjetine keletin kiristi 60%-ǵa kemitti. Jergilikti depýtattardyń málimeti boıynsha Venesýeladaǵy ınflıatsııa deńgeıi qazir 140%-ǵa jetken.
«Bul shara adamdardy qorǵaý úshin qabyldandy. Bılik ekonomıkalyq problemalardy tıimdi ári ýaqytyly sheshý úshin osyndaı qadamǵa baryp otyr. Jarlyqtyń ózi sheteldik ınvestıtsııalardy tartýǵa jáne jekemenshik salanyń óndiris kólemin arttyrýǵa qolaıly jaǵdaı týdyrýǵa baǵyttalǵan», - dedi Venesýelanyń Ekonomıka mınıstri Lýıs Salas.
