Venesýela prezıdenti Tramppen ne týraly áńgimeleskenin aıtty

ASTANA.KAZINFORM — Venesýela prezıdenti Nıkolas Madýro ótken aıdyń sońynda AQSh-tyń Karıb teńizindegi áskerı kúshteriniń kúsheıýi kezinde Aq úı basshysy Donald Tramppen telefon arqyly sóıleskenin rastady, dep habarlaıdy Al Jazeera.

— Alty jyl atqarǵan Syrtqy ister mınıstri qyzmetinde men dıplomatııalyq saqtyqqa úırendim. Keıinirek qolbasshymyz Chavestiń tálimgeri retinde syrtqy ister mınıstri qyzmetinde tájirıbe jınaǵan men prezıdent laýazymynda saqtyqty burynǵydan beter qatty baǵalaıtyn boldym, — dedi Madýro.

Bul rette ol Venesýelanyń burynǵy prezıdenti Ýgo Chavesti meńzegen edi. Chavestiń kezinde Madýro Syrtqy ister mınıstri bolǵan. 

Madýro bul qońyraýdyń ózara qurmetke negizdelgen dıalogqa degen qadam bolatynyna qýanatynyn jáne óz eliniń tek beıbitshilikke umtylatynyn jetkizdi.

-Maǵan mıkrofonmen júzege asyrylatyn dıplomatııa unamaıdy. Mańyzdy máseleni túbegeıli sheshpeıinshe, tynyshtyq saqtaǵan durys, — dep málimdedi Venesýela kóshbasshysy.

Madýro Tramppen bolǵan áńgime týraly endi aıta bermeıtinin jáne óziniń tek «aqyl» men qurmetti durys kóretinin jetkizdi.  

Jeksenbide Tramp Vashıngton men Karakas arasyndaǵy sońǵy jyldardaǵy eń kúrdeli dıplomatııalyq daǵdarys kezinde Venesýela kóshbasshysymen telefon arqyly sóıleskenin aıtty.

— Men onymen qysqasha sóılestim, oǵan birneshe nárse aıttym, ne bolatynyn kóremiz, — dedi Tramp Aq úıde ótken baspasóz máslıhatynda.

Qarasha aıynyń basynda Tramp ákimshiliginiń esirtki kartelderine qarsy naýqany aıasynda AQSh-tyń ushaq tasymaldaýshy kemeleri Karıb teńizine keldi.
AQSh prezıdenti Donald Tramp ta Venesýelada qurlyqta áskerı operatsııa bolý múmkindigin joqqa shyǵarmady.

Buǵan deıin Tramp Venesýela prezıdentimen kelissóz júrgizýi múmkin ekenin habarlaǵan edik.