Venesýela prezıdenti Madýro eliniń egemendigin qorǵaýǵa daıyn ekenin málimdedi
ASTANA. KAZINFORM — Venesýela prezıdenti Nıkolas Madýro beıbit jolmen retteýge umtylatynyna qaramastan, eldiń óz egemendigi men aýmaqtyq tutastyǵyn qorǵaýǵa daıyn ekenin málimdedi. Bul týraly agenttigi TASS habarlady.
Bul jóninde onyń Latyn Amerıkasy men Karıb basseıni elderiniń basshylaryna, sondaı-aq BUU-ǵa múshe memleketterge joldaǵan úndeýinde aıtylǵan.
Prezıdenttiń úndeýin ulttyq Venezolana de Televisión telearnasynyń efırinde Venesýelanyń syrtqy ister mınıstri Ivan Hıl Pınto oqyp berdi. Qujatta Karakas qoldanystaǵy zańnama aıasynda óziniń ulttyq múddeleri men tabıǵı resýrstaryn qorǵaýǵa nıetti ekeni atap ótilgen.
Madýro AQSh-ty Venesýelaǵa qysymdy kúsheıtti dep aıyptap, onyń aıtýynsha, amerıkalyq qarýly kúshter Karıb teńizinde jáne Tynyq muhıtynyń shyǵys bóliginde azamattyq kemelerge 28 ret shabýyl jasaǵan. Ol bul áreketterdiń saldarynan 104 adamnyń qaza tapqanyn málimdedi. Sonymen qatar Madýro Venesýelanyń Vashıngton tarapynan áskerı qysymdy aqtaıtyndaı eshqandaı áreket jasamaǵanyn atap ótti.
Sondaı-aq ol AQSh-tyń halyqaralyq sýlarda venesýelalyq munaı tıelgen eki tankerdi basyp alǵanyn jáne energııa resýrstaryn jetkizýge qatysty is júzinde teńiz blokadasyn jarııalaǵanyn habarlady. Onyń aıtýynsha, bul halyqaralyq quqyq sheńberinen shyǵatyn júıeli túrde kúsh qoldaný áreketterine jatady.
Madýro venesýelalyq munaı tasymalynyń buǵattalýy álemdik energetıkalyq naryqtarǵa, sondaı-aq Latyn Amerıkasy men Karıb óńiri elderindegi ekonomıkalyq jaǵdaıǵa teris áser etýi múmkin ekenin aıtty. Ol energetıkalyq resýrstardy saıası qysym nemese áskerı qaqtyǵys quraly retinde paıdalanýǵa bolmaıtynyn atap ótti.
Eske salaıyq, AQSh Venesýela prezıdenti Nıkolas Madýronyń otbasy múshelerin qosa alǵanda, jeti adamǵa qatysty birqatar sanktsııa engizgen.
Buǵan deıin amerıkalyq áskerı kúshter Venesýela jaǵalaýynda munaı tıegen Skipper tankerin basyp alǵan edi. 17 jeltoqsanda AQSh prezıdenti Donald Tramp Venesýelaǵa jáne Venesýeladan qatynaıtyn, sanktsııaǵa ilikken barlyq munaı tankerlerine tolyq blokada engizdi. Alaıda Venesýela Tramptyń blokada týraly málimdemesine qaramastan, munaı saýdasyn jalǵastyratynyn habarlady.
Al Venesýela BUU Qaýipsizdik Keńesi tótenshe otyrysyn ótkizýdi surady.