Venesýela óziniń sońǵy muzdyǵynan aıyryldy
KARAKAS. KAZINFORM – Sheteldik BAQ kózderiniń habarlaýynsha, ótken ǵasyrda memlekettegi 6 muzdyq joıylyp ketken. Sońǵysy, La Korona dep te atalatyn Gýmboldt muzdyǵy statıkalyq muz alańy retinde tanyldy, biraq ol da eki gektarǵa deıin qysqarǵan, dep jazady AZERTADJ.
AccuWeather portaly keltirgen zertteýlerde muzdyqtardyń erýine negizgi sebep retinde klımattyń ózgerýin ataıdy. 2020 jylǵy zertteýge sáıkes, 1952 jáne 2019 jyldar aralyǵynda Venesýela muzdyqtarynyń aýdany 98 paıyzǵa qysqardy. 1998 jyly muzdyqtardyń sheginýi eń joǵary deńgeıge jetti.
Qazirgi tańda Venesýela muzdyqsyz qalǵan álemdegi birinshi elge aınaldy.
Venesýela bıligi muzdyqtardy saqtaýǵa tyrysty. Atap aıtqanda, olar bul úshin termııalyq kórpelerdi paıdalandy. Alaıda bul nátıje bermedi, klımatologtar tipti el úkimetin qorshaǵan ortany lastaǵany úshin aıyptady.
Sarapshylardyń pikirinshe, 2100 jylǵa qaraı álemdegi muzdyqtardyń 20-80 paıyzy joǵalyp ketýi múmkin. Bul ekojúıege de, adamdarǵa da áserin tıgizedi: teńiz deńgeıi kóteriledi, klımat ózgeredi, mádenı muralar zardap shegedi.
