Venesýela Nobel syılyǵy tabystalǵannan keıin Norvegııadaǵy elshiligin jabatyn boldy

ASTANA.KAZINFORM - Venesýela úkimeti Norvegııadaǵy elshiligin jabý týraly sheshim qabyldady. Bul sheshim Venesýela oppozıtsııasynyń jetekshisi Marııa Korına Machado norvegııalyq Nobel komıtetinen Beıbitshilik syılyǵyn alǵannan keıin kóp uzamaı qabyldandy, - dep habarlaıdy BBC.

Venesýela bıligi óz málimdemesinde Nobel komıtetiniń sheshimi týraly aıtpady jáne elshilik eldiń dúnıejúzindegi dıplomatııalyq ókildikterin qaıta qurylymdaý aıasynda jabyldy dep málimdedi.

Norvegııa Syrtqy ister mınıstrligi Karakastyń Oslodaǵy elshiligin eshbir túsiniktemesiz jaýyp tastaǵanyn aıtyp, bul sheshimdi «ókinishti» dep atady.

-Birqatar másele boıynsha kelispeýshilikterimizge qaramastan, Norvegııa Venesýelamen dıalogty jalǵastyrǵysy keledi jáne osy baǵytta jumysty jalǵastyrady, - dedi Norvegııa Syrtqy ister mınıstrliginiń ókili.

Ol Nobel syılyǵynyń «Norvegııa úkimetinen táýelsiz» beriletinin aıtty.

Venesýela úkimeti óz málimdemesinde Aýstralııadaǵy elshiligin jaýyp, Zımbabve men Býrkına-Fasodaǵy jańa ókildikterdi ashatynyn, olardy «gegemonııaǵa» qarsy «kúrestegi strategııalyq seriktester» dep ataǵanyn atap ótti.

Esterińizge sala keteıik, 10 qazanda Venesýela saıasatkeri Marııa Korına Machado 2025 jylǵy Beıbitshilik salasyndaǵy Nobel syılyǵyn «Venesýela halqynyń demokratııalyq quqyqtaryn ilgeriletý jolyndaǵy tynymsyz qyzmeti jáne dıktatýradan demokratııaǵa ádil jáne beıbit jolmen kóshý jolyndaǵy kúresi úshin» alǵan bolatyn.

Marııa Korına Machado 2024 jyly Venesýeladaǵy prezıdenttik saılaýda oppozıtsııanyń jalǵyz kandıdaty boldy, biraq bılik onyń kandıdatýrasyna tosqaýyl qoıdy. Ol oppozıtsııalyq praımerızde 90%-dan astam daýys jınady jáne onyń aınalasynda kóptegen oppozıtsııalyq partııalar, sonyń ishinde bir-birimen janjaldasyp jatqan partııalar birikti.

Alaıda, praımerızden buryn da Venesýela bıligi Machadony Venesýelaǵa qarsy sanktsııalardy qoldady dep aıyptap, oǵan 15 jylǵa saılaýǵa qatysýǵa tyıym saldy. Ol apellıatsııalyq shaǵym túsirdi, biraq prezıdent Nıkolas Madýro jaqtaýshylarynyń yqpalymen Joǵarǵy sot shaǵymdy qabyldamady.

AQSh prezıdenti Donald Tramp bıylǵy jyly Beıbitshilik salasyndaǵy Nobel syılyǵyn alǵysy keldi: ol dúnıejúzindegi soǵystardy toqtatýǵa kúsh salǵany úshin bul syılyqqa laıyq ekenin birneshe ret aıtqan.

Nobel komıteti óz sheshimin jarııalaǵannan keıin Machado Trampqa telefon soǵyp, «Venesýela halqy Amerıkada ǵana emes, búkil álemde bostandyq pen demokratııa úshin jasap jatqan barlyq isteri úshin oǵan qanshalyqty rıza ekenin» aıtty.

Nobel ınstıtýty Beıbitshilik syılyǵy laýreatynyń aty-jóniniń jarııa bolýyn zerttep jatqany buǵan deıin habarlanǵan bolatyn.

Buǵan nátıjelerdiń resmı jarııalanǵanyna birneshe saǵat qalǵanda Marııa Korına Machadonyń kandıdatýrasyna onlaın stavkalardyń ádetten tys kúrt ósýi sebep boldy.