Venesýela eldiń áýe keńistigin zańsyz kesip ótken shaǵyn ushaqty toqtatty
ASTANA. KAZINFORM — Venesýelanyń Qarýly kúshteri (FANB) eldiń áýe keńistigin zańsyz kesip ótken shaǵyn ushaqty toqtatqanyn habarlady.
Jergilikti BAQ málimeti boıynsha, Karıb teńizindegi araldardyń birinen ushyp shyqqan ushaqtyń esirtki tasymalyna qatysy bar. FANB kúshteri áýe kemesin Apýre shtatyndaǵy Romýlo Galegos aýyldyq aımaǵynda, Kolýmbııa shekarasynda toqtatyp, beıtaraptandyrdy.
Habarlamada CESSNA 310 tıpindegi ushaq radar arqyly anyqtalǵany, onyń esirtki kontrabandısterimen baılanysy bar dep tanylǵany jáne bul operatsııa kontrabandısterge strategııalyq soqqy bolǵany atap ótilgen.
Bılik qaýipsizdik kúshteri zańsyz qarýly toptar men esirtki saýdasyna qarsy operatsııalaryn jalǵastyra beretinin aıtty. Aldyńǵy aptada FANB budan bólek taǵy úsh ushaqty Kolýmbııa shekarasyna jaqyn eki aýdannan beıtaraptandyrǵan. Olardyń da esirtki saýdasyna qatysy bar ekeni anyqtaldy.
Eske sala ketsek, AQSh Venesýela jaǵalaýynda esirtki tasymaldaýshylardyń kemesine soqqy jasady.