Venesýela bıligi jer silkinisinen zardap shekkender sanynyń artqanyn habarlady
ASTANA. KAZINFORM — Venesýelada bolǵan joıqyn jer silkinisteri saldarynan qaza tapqandar sany 3 899 adamǵa jetti. Taǵy 16 740 adam jaraqat alǵan, dep habarlaıdy Report.
Bul týraly Venesýela Ulttyq assambleıasynyń tóraǵasy Horhe Rodrıges málimdegen.
Onyń aıtýynsha, gýmanıtarlyq kómek 86 794 otbasyǵa jetkizilip, 16 892 otbasy 89 ýaqytsha ornalastyrý lagerine jaıǵastyrylǵan.
Óz kezeginde AQSh-tyń Karakastaǵy elshiligi amerıkalyq gýmanıtarlyq kómektiń Venesýelanyń 30 myńnan astam turǵynyna kórsetilgenin habarlady. Kómek Global Empowerment Mission (GEM) baǵdarlamasy aıasynda taratylyp jatyr.
Panamerıkalyq densaýlyq saqtaý uıymy (PADU) eldegi jaǵdaıdyń áli de tótenshe kúıde ekenin málimdedi. Uıymnyń baǵalaýynsha, tabıǵı apattyń saldaryn joıý úshin 24 mıllıon dollar qajet. Alaıda ázirge onyń shamamen 9 mıllıon dollary ǵana jumyldyrylǵan.
PADU dırektory Jarbas Barbozanyń aıtýynsha, qazirgi negizgi qaýipter — medıtsınalyq kómektiń úzilýi, taza aýyzsýdyń tapshylyǵy, ýaqytsha panalaý oryndarynyń shamadan tys tolýy jáne vaktsınatsııany jalǵastyrý qajettiligi.
Eske salaıyq, 24 maýsymda Venesýelada araǵa nebári 39 sekýnd salyp magnıtýdasy 7,2 jáne 7,5 bolatyn eki joıqyn jer silkinisi tirkeldi. BUU Damý baǵdarlamasynyń baǵalaýynsha, tabıǵı apattan kelgen ekonomıkalyq shyǵyn shamamen 6,7 mıllıard dollar boldy. Qazirgi ýaqytta izdestirý-qutqarý jumystary jalǵasyp jatyr.
