«Venesýela arýyn» óltirgen kúdiktiler qolǵa tústi
ASTANA. 10 qańtar. QazAqparat - Burynǵy «Venesýela arýy» men onyń jubaıynyń ólimine qatysy bar degen kúdikpen jeti adam ustaldy.
Bul týraly Associated Press habarlap otyr.
Polıtseılerdiń málimetinshe, kúdiktilerdiń izine túsýge qaza bolǵan kelinshektiń beınekamerasy kómektesken. Qoldy bolǵan kamera qaraqshylardyń biriniń úıinen tabylǵan kórinedi.
Qamaýǵa alynǵandardyń arasynda Borsyq Danılo (El Gordo Danilo) degen laqap atymen tanys 32 jastaǵy jergilikti bandanyń kóshbasshysy da bar. Polıtsııanyń boljamyna qaraǵanda, burynǵy «Venesýela arýy» men onyń kúıeýin óltirýge 11 adamnyń qatysy bar. Solardyń tórteýin ázirge ustaý múmkin bolmaı otyr, olarǵa izdeý jarııalanǵan. Sondaı-aq, polıtsııa ázirge arý men onyń kúıeýi óltirilgen qarýdy da taba almaı jatyr.
Aıta keteıik, 29 jastaǵy Venesýela arýy - Monıka Spır (Monica Spear) men onyń 39 jastaǵy kúıeýi Genrı Berrı (Henry Berry) 6 qańtar kúni Pýerto-Kabelo men Valensııa aralyǵyndaǵy tasjolda bolǵan tonaý barysynda óltirilgen. Jubaılar men olardyń 5 jasar qyzy mingen avtokólik qylmyskerler aldyn ala jolǵa tastaǵan tikenekti temirdi basa ótken kezde dońǵalaqtary jarylyp, toqtaǵan. Sol kezde qandy qoldar oılaryn iske asyrypty. Áke-sheshesiniń ólimine kýá bolǵan kishkentaı qyz bala aıaǵynan jaralanyp, aman qalǵan.
Qylmys oryn alysymen polıtsııa 5 adamdy ustaǵan bolatyn, alaıda olardyń qylmysqa qatysy dáleldenbeı, bosatyldy.
Aıta ketý kerek, Venesýela arýy men kúıeýiniń ólimi elde úlken tolqý týǵyzdy. Halyq bıliktiń kún sanap kóterilip kele jatqan qylmys deńgeıin aýyzdyqtaýǵa qaýqary jetpeı otyrǵanyn synǵa alýda.
