Venesýela AQSh-pen alǵashqy dıplomatııalyq baılanystardy bastaıdy

ASTANA. KAZINFORM — Venesýela AQSh-pen dıplomatııalyq baılanystardy «synaq formatynda» bastaýǵa sheshim qabyldady. Bul týraly juma kúni Venesýela Syrtqy ister mınıstri Ivan Hıl Pınto resmı málimdeme jasady, dep habarlaıdy Sınhýa.

Óziniń áleýmettik jelidegi paraqshasynda Ivan Hıl Pınto kelissózderdiń maqsaty – AQSh tarapynan bolǵan agressııa saldarlaryn joıý jáne Venesýela prezıdenti Nıkolas Madýro men onyń jubaıyna qatysty jaǵdaıdy retteý ekenin aıtty.

Pıntonyń jazbasyna sáıkes, synaq formatyndaǵy kelissózder «eki tarapqa ortaq qyzyǵýshylyq týdyratyn máseleler boıynsha jumys josparlaryn» da qamtıdy.

Aıta keteıik, arnaıy operatsııa barysynda Venesýela prezıdenti Nıkolas Madýro men onyń jubaıy AQSh-qa evakýatsııalanyp, tutqyndaldy.

Venesýelaǵa qarsy áskerı operatsııaǵa 150 bombalaýshy, joıǵysh jáne barlaý ushaǵy qatysqany belgili boldy.

AQSh-tyń Venesýelaǵa jasaǵan shabýyly saldarynan keminde 40 adam qaza tapqany anyqtaldy.

Madýro Nıý-Iorkte esirtki saýdasy aıyby boıynsha sot aldynda jaýap berdi.

Venesýelanyń burynǵy basshysy men onyń jubaıy alǵashqy sot otyrysynda ózin kináli dep tanymaıtyndaryn málimdedi.

Keıinnen Delsı Rodrıges Venesýelanyń ýaqytsha prezıdenti retinde ant berdi.

Sonymen qatar Venesýelada AQSh-tyń áskerı aralasýy kezinde qajetti qaýipsizdik sharalaryn qamtamasyz ete almaǵany úshin prezıdent Nıkolas Madýronyń kúzet qyzmetine jaýapty general-maıor Haver Markano Tabata qyzmetinen bosatyldy.

Venesýelanyń ýaqytsha prezıdenti Delsı Rodrıges AQSh qarýly kúshteriniń operatsııasy barysynda qaza tapqan qaýipsizdik qyzmetkerlerin eske alý maqsatynda elde jeti kúndik ulttyq aza tutý kúnin jarııalady.