Venetsııada qazaqstandyq fılmder kórsetiledi
«Qazaqstan jaıly bilińiz: aýdıovızýaldy damýdyń jańa shekaralary» atty sharada myna qazaqstandyq kartınalar kórsetiledi: «Ózen» (rej. E.Baıǵazın), «Arýaq» (rej.H.Ahmetov), «Ámire» (rej. D.Vespa), «Talan» (rej. B.Qalymbetov), «Ol» (rej. A.Sataev), «Almas qylysh» (rej. R.Ábdirashov), «Anaǵa aparar jol» (rej. A.Sataev), «Oralman» (rej. S.Qýumanbekov), «Bizdiń qalanyń kishkentaı hanzadasy» (rej. T.Temenov), «Shyńyraý» (rej. J.Jetirýov), «Jat» (rej. E.Tursynov). Sonymen birge, «Kúltegin» (rej. A.Ábildınov), «Jumper» (rej. Arman Beısembaev) pen «Muzbalaq» (rej. T.Maıdan men T.Tóleýǵazy) anımatsııalyq fılmderiniń treıleri pash etilmek.
«Qazaqstandyq kınematografıster men óner qaıratkerleri úshin bul óte mańyzdy bolyp tabylady. Sebebi, mundaı sharalar kóbinese bizdiń kıno men mádenıet salasynyń órkendeýine úles qosady. Osyǵan baılanysty men ANICA ıtalııalyq kompanııasynyń halyqaralyq departametiniń basshysy Roberto Stabılege erekshe alǵysymdy aıtqym keledi. Jalpy, Venetsııada ónerdiń óte joǵary baǵalanatynyn bilemiz. Bizdiń sharanyń Venetsııalyq kınofestıvalmen tuspa-tus uıymdastyrylyp jatqany qýantady», - deıdi «Eýrazııa» halyqaralyq kınofestıvaliniń prezıdenti Aıman Musaqojaeva.
Sonymen qatar, shara aıasynda quryltaıshysy Qazaqstan Respýblıkasynyń Mádenıet jáne sport mınıstrligi bolyp tabylatyn «Eýrazııa» kınofestıvali tanystyrylady. «Eýrazııa» - Halyqaralyq kınoprodıýsserler qaýymdastyǵynyń federatsııasynda (FIAPF) tirkelgen Ortalyq Azııadaǵy iri kınoforým.
Venetsııaǵa Qazaqstan jaqtan rejısserler Bolat Qalymbetov, Toqtar Qarsaqbaev, Talǵat Temenov, akterlar Sanjar Mádıev barady.
