Venetsııada qazaqstandyq fılmder kórsetildi
ASTANA. QazAqparat - Venetsııanyń Lıdo aralynda 75-shi mereıtoılyq Venetsııa kınofestıvalinde otandyq jańa kınotýyndylar treıleriniń tanystyrylymy ótti, dep habarlaıdy QazAqparat tilshisi «Eýrazııa» Halyqaralyq kınofestıvali dırektsııasyna silteme jasap.
Іs-shara «Eýrazııa» Halyqaralyq kınofestıvali dırektsııasyn yń uıymdastyrýymen Exselcior otelinde Italııa pavılonynda QR Mádenıet jáne sport mınıstrliginiń, Qazaqstannyń Italııadaǵy elshiliginiń qoldaýymen uıymdyryldy.
Mádenı is-sharany «Eýrazııa» kınofestıvaliniń prezıdenti Aıman Musaqojaeva ashty.
«Bizdiń festıval otandyq kınony tanytýǵa basymdyq beredi. Búgin Qazaqstan alǵash ret otandyq kınematografty Venetsııa kınofestıvali aıasynda tanystyryp otyr. Italııalyq ANICA kompanııasynyń halyqaralyq departamentiniń basshysy Roberto Stabıle bizge pavılon usynyp, sharamyzdy ótkize aldyq. Bul shara bizdiń kınomyz ben mádenıetimizdiń damýyna áser etetindikten, qazaq kınematografısteri men mádenıet qaıratkerleri úshin óte mańyzdy oqıǵa bolyp otyr. Otandyq fılmderimizdi, onyń ishinde Baıǵazınniń fılminiń de treılerin kórsetip, tanystyrdyq»,- dedi «Eýrazııa» kınofestıvaliniń prezıdenti Aıman Musaqojaeva.
«Qazaqstandy ash: aýdıovızýaldy damytýǵa arnalǵan jańa múmkindikter» atty is-sharaǵa ıtalııalyq ANICA kompanııasynyń halyqaralyq departamentiniń basshysy Roberto Stabıle,Italııanyń Qazaqstandaǵy Saýda palatasynyń hatshy-keńesshisi Savına Korsarı, Rai telekompanııasynyń ókili Karlo Jantıle men Italııa mádenıet mınıstrliginiń ókili qatysty. Otandyq kınogerler Samal Eslıamova, Bolat Qalymbetov, Toqtar Qarsaqbaev, Talǵat Temenov, Sanjar Mádıev, Shyńǵys Kapın jáne Eýrazııa jobalar naryǵynda ekinshi oryndy jeńip alǵan jas rejısser Ashat Kýchınchırekov te is-sharaǵa qatysty.
Sharada «Ózen» (rej. E.Baıǵazın), «Árýaq» (rej.H.Ahmetov), «Ámire» (rej. D.Vespa), «Talan» (rej. B.Qalymbetov), «Ol» (rej. A.Sataev), «Almas qylysh» (rej. R.Ábdrashev), «Anaǵa aparar jol» (rej. A.Sataev), «Oralman» (rej. S.Qurmanbekov), «Bizdiń qalanyń kishkentaı hanzadasy» (rej. T.Temenov), «Shyńyraý» (rej. J.Jetirýov), «Jat» (rej. E.Tursynov). Budan bólek «Kúltegin» (rej. A.AÁbildınov), «Jumper» (rej. Arman Beısembaev) jáne «Muzbalaq» (rej. T.Maıdan, T.Tóleýǵazy) syndy anımatsııalyq fılmderdiń treılerleri sheteldik sale agentterge usynyldy.
Sondaı-aq, shara barysynda QR Mádenıet jáne sport mınıstriligi quryltaıshysy bolyp tabylatyn «Eýrazııa» kınofestıvali tanystyrylady.
«Bıyl biz alǵash ret «Venice production bridge» baǵdarlamasynda Astanada ótken festıvalimizdiń qonaǵy bolǵan ANICA kompanııasynyń ókili, bizdiń seriktesimiz Roberto Stabıleniń arqasynda qatysyp otyrmyz. Otandyq kıno ýnıversıtetterin, «Qazaqfılm» kınostýdııasyn, jeke menshik stýdııalardy tanystyrdyq jáne otandyq kınematografıster sheteldik ınfestorlarǵa usyna alatyn barlyq qyzmet túrlerin aıttyq. Sonymen qatar, biz sheteldik kınematografıstermen bizdiń rejısserlerdi, akterlerdi tanystyryp, baılanys ornattyq»,- dedi «Eýrazııa» kınofestıvaliniń Art-dırektory Dıana Áshimova.
Óz kezeginde Rai kompanııasynyń ókili Karlo Jantıle qazaqstandyq kartınalardy telearnalar arqyly kórsetý maqsatynda satyp alýǵa daıyn ekenin bildirdi.
