Venetsııa taǵy da sý astynda qaldy
RIM. ANSA-QazAqparat – Teńiz deńgeıi kútpegen jerden kóterilip, oǵan qatty jel qosylyp Venetsııadaǵy Áýlıe Mark soborynyń eń kóne, tómengi bóligi sý astynda qaldy, dep habarlaıdy QazAqparat ANSA agenttigine silteme jasap.
Venetsııada teńiz deńgeıi 122 sm-ge deıin kóterilgen. 130 sm qaýipti dep eseptelgen jáne jergilikti bıliktiń aıtýynsha, qate boljamdarǵa baılanysty jaqynda tájirıbelik negizde kúshine engen «Moıseı» qorǵanys júıesi iske qosylmaǵan. Boljam boıynsha sý deńgeıi 145 sm-ge deıin kóterilýi múmkin.
Italııada el boıynsha qolaısyz aýa raıyna qatysty eskertý jarııalandy. Ol jeksenbige deıin sozylýy múmkin. Taýlardan kóshkin júrgeni týraly habarlanyp jatqan Veneto, Frıýlı-Venetsııa-Djýlııa, Emılııa-Romanıa aımaqtary, sondaı-aq ońtústik Kampanııa jáne Sıtsılııa araly tabıǵat apatynan kóbirek zardap shekti.
Appenınniń ortalyǵy men soltústigine qatty daýyl soǵyp, nóser jańbyr jaýdy. Bul óńirde de tasqyn men sý deńgeıiniń kóterilgeni týraly habarlanyp jatyr. Soltústikte tipti 600-800 metr bıiktikke qar túsken.
Seısenbi kúni meteoeskertýdiń eń joǵary «qyzyl» dárejesi jarııalanǵan Latsıodaǵy Tıbr ózeniniń sý deńgeıi baqylaýǵa alyndy.
