Venetsııa bıennalesinde Qazaqstan pavılony ashylady
ALMATY. QazAqparat- Qazaqstan 2022 jyldyń səýir aıynda Venetsııa bıennalesinde tuńǵysh resmı pavılonyn ashady, dep habarlaıdy QazAqparat tilshisi.
Venetsııa bıennalesine Qazaqstan atynan ORTA transdıstsıplınar ujymy qatysady. Ujym jobasy ataqty almatylyq sýretshi Sergeı Kalmykovtyń (1891- 1967) ıdeıalaryna negizdelgen.
Komanda quramynda aktrısa Aleksandra Morozova, rejısser Rústem Begenov, Darıa Djýmelıa, sýretshiler Aleksandr Baqanov pen Sabına Qýanǵalıeva bar.
«Venetsııa bıennalesindegi jeke ulttyq pavılon – qazaqstandyq art-sahnadaǵy kópten kútken oqıǵanyń biri. Qazaqstannyń Venetsııadaǵy tuńǵysh pavılonynda komıssar bolý – men úshin úlken mərtebe. Ónerdi birinshi kezekte kommýnıkatsııa retinde qarastyrýǵa bolady, al Venetsııadaǵy ulttyq pavılondar arqyly shartaraptyń daýsyn estýge, ıaǵnı bir kózqarasqa baılanyp qalmaı, ýaqyt rýhyn seziný múmkindigi bar. Bul pavılon əlem boıynsha da, el ishinde de qazaqstandyq zamanaýı ónerdi qoldaýǵa jəne tanystyrýǵa arnalǵan kóptegen jobanyń birine aınalady dep úmittenemin», – deıdi Qazaqstan pavılony komıssary Merýert Qalıeva
Qazaqstan 2005-2013 jyldar aralyǵynda sharaǵa Ortalyq Azııa elderi pavılony aıasynda, al odan keıingi ýaqytta túrli mədenı ınstıtýtsııanyń óz betinshe uıymdastyrǵan bastamalary sheńberinde qatysyp keldi.
Bıyl Qazaqstan tuńǵysh resmı ulttyq pavılonyn tanystyrady. Pavılondy Qazaqstannyń zamanaýı óner qory Ə.Qasteev atyndaǵy QR Memlekettik óner murajaıymen seriktestikte, «Səbı» qaıyrymdylyq qory, Nurlan Smaǵulov qory, G&G kompanııasy, Marýsıa Asaýbaeva qorynyń qoldaýymen jəne QR Mədenıet jəne sport mınıstrligi qatysýymen uıymdastyrmaq.
Venetsııa bıennalesi – eń bedeldi halyqaralyq kórkemóner kórmeleriniń biri. Ol 1895 jyldan beri 2 jylda bir ret Venetsııada uıymdastyrylyp keledi. Bıennale – əlem óneriniń damý baǵytyn anyqtaıtyn oqıǵa. 59-bıennale 2022 jyldyń 23 səýiri men 27 qarashasy aralyǵynda ótedi.
