Venchýrlyq ınvestıtsııalardyń jetkiliksizdigi ınnovatsııalardy tejep keledi - Jeńis Qasymbek
ASTANA. QazAqparat - Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine táýekeldik (venchýrlik) qarjylandyrý máseleleri boıynsha ózgerister men tolyqtyrýlar engizý týraly» zań jobasy birinshi oqylymda maquldandy, dep habarlaıdy QazAqparat.
«Jeke venchýrlyq ınvestıtsııalardy tartý arqyly ınnovatsııalyq jáne tehnologııalyq bızneske qoldaý kórsetý álemde keń taraǵan. Onyń kólemi ondaǵan mıllıard AQSh dollaryna jetedi. Mysaly AQSh-ta 52 mlrd dollarǵa jetken, bul kórsetkish 2017 jylǵa tıesili. Al Qytaıda onyń deńgeıi 15,5 mlrd, Eýrapalyq odaqta - 10,5 mlrd, Úndistanda - 5 mlrd astam dollardy, Kanadada 1,5 mlrd dollardy qurady», - dep toqtaldy Investıtsııalar jáne damý mınıstri Jeńis Qasymbek.
Onyń sózine qaraǵanda, búginde Qazaqstanda venchýrlyq qarjylandyrýdyń naryǵy damymaǵan. Venchýrlyq nemese táýekeli joǵary qarjylandyrýmen aınalysatyn elimizdiń ınvestorlary óz qarjylaryn sheteldik jobalarǵa shetel quzyretteri arqyly baǵyttaıdy. Sol jerlerde olar tıisti salyqtyq jeńildikter alyp, venchýrlyq qarjylandyrý boıynsha sharttardy qurylymdaý úshin sheteldik zańnamany paıdalanady.
«Qoljetimdi venchýrlyq ınvestıtsııalardyń bolmaýy ınnovatsııalyq qyzmetti tejep keledi», - dep túsindirdi J. Qasymbek.
Venchýrlyq naryqty qalyptastyrýdyń birneshe negizgi problemasy baıqalyp otyr. Osy oraıda, venchýrlyq qarjylandyrý boıynsha sharttardyń ereksheligi bolyp tabylatyn qajetti tetikter men kelisim qurylymynyń zańnamada joqtyǵy málesi bar. Ekinshiden, venchýrlyq ınvestıtsııalar úshin salyqtyq jáne basqa da yntalandyrýshy tetikterdiń jetkiliksizdigi baıqalyp otyr.
Mınıstr zań jobasynyń eki negizgi bloktarynyń mazmuny týraly baıandap berdi.
Birinshi blok - venchýrlyq qorlar qyzmetiniń quqyqtyq negizi. Birinshiden, Investıtsııalyq qorlar týraly Zańǵa túzetýler eskerilgen. Bul turǵyda túzetýlerdiń negizi jańa túsiniktemeler men anyqtamalardy engizýge arnalǵan. Ekinshiden, venchýrlyq qorlar formasynyń erekshelikteri, olardyń quqyqtyq erejesi, qyzmeti men olardy basqarý qarastyrylady. Úshinshiden, kelisimderdiń jańa formalary engiziledi.
Ekinshi blok memlekettik qoldaý sharalarynyń quqyqtyq negizine arnalǵan. Osy baǵytta birqatar zańnamaǵa túzetýler qarastyryldy.
Jeńis Qasymbektiń aıtýynsha, túzetýlerdi qabyldaýdan ońtaıly nátıjelerge qol jetkiziledi. Bul turǵyda venchýrlyq kapıtaldyń jeke naryǵyn yntalandyrý, tsıfrlyq jáne basqa da ınnovatsııalyq sheshimderdi ázirleýshilerdiń jeke ekojúıesin damytý, naqty sektordyń ınnovatsııalyq belsendigin arttyrý, sheteldik ınvestıtsııalardy tartý sekildi basymdyqtar qamtylmaq.
