Venada ótken EQYU konferentsııasynda Qazaqstannyń tájirıbesi usynyldy
ASTANA. KAZINFORM – Vena qalasynda ótken Eýropadaǵy qaýipsizdik jáne yntymaqtastyq uıymynyń (EQYU) Adam saýdasyna qarsy kúres jónindegi alıansynyń 26-shy konferentsııasynda Qazaqstannyń osy baǵyttaǵy tájirıbesi tanystyryldy.
Іs-sharaǵa Syrtqy ister mınıstrliginiń Erekshe tapsyrmalar jónindegi Elshisi Stanıslav Vasılenko bastaǵan qazaqstandyq delegatsııa qatysty. Delegatsııa basshysy negizgi sessııada EQYU Bas hatshysy Ferıdýn Sınırlıoglý, Demokratııalyq ınstıtýttar jáne adam quqyqtary jónindegi bıýro dırektory Marııa Telalıan, EQYU-nyń Adam saýdasyna qarsy kúres jónindegi arnaıy ókili Kerı Djonston jáne basqa da halyqaralyq sarapshylarmen qatar sóz sóıledi.
– Bul alań ulttyq jáne halyqaralyq deńgeıdegi kúsh-jigerdi úılestirýge múmkindik beredi. Adam saýdasy áli de adam quqyqtarynyń eń aýyr buzylýynyń biri bolyp otyr jáne kóbinese jasyryn sıpatta bolady. Sondyqtan bul máselege qarsy kúreste aldyn alý, anyqtaý, tergeý jáne jábirlenýshilerdi qorǵaý sharalaryn qamtıtyn keshendi tásil qajet, – dedi Stanıslav Vasılenko.
Konferentsııa qatysýshylaryna Qazaqstanda adam saýdasyna qarsy kúres baǵytynda qabyldanyp jatqan sharalar týraly aqparat berildi. Atap aıtqanda, elimizdiń adam quqyqtary salasyndaǵy 60-tan astam kópjaqty halyqaralyq sharttarǵa, onyń ishinde qazirgi zamanǵy quldyq túrlerine qarsy baǵyttalǵan 13 qujatqa qosylǵany aıtyldy.
Qazaqstan 2003 jyly qabyldanǵan EQYU-nyń adam saýdasyna qarsy is-qımyl josparyna qosylǵanyn jáne qazirgi ýaqytta 2027–2029 jyldarǵa arnalǵan ulttyq jospardy jańartý jumystaryn júrgizip jatqany da atap ótildi.
Konferentsııa aıasyndaǵy «Aman qalýdy qylmystyq jaýapkershilikke tartý: adam saýdasynyń jasyryn aspektilerin ashyq talqylaý» atty taqyryptyq sessııada qazaqstandyq sarapshy Sáken Qabıbolla Mıanmadaǵy tájirıbesimen bólisip, mundaı jaǵdaılardyń aldyn alý boıynsha usynystaryn usyndy.
Aıta keteıik, Aqmola oblysynda adam saýdasyna qatysty úsh is toqtatyldy.
