Venada Qazaqstannyń Táýelsizdik kúni merekesine oraı saltanatty kesh ótti
ASTANA. 18 jeltoqsan. QazAqparat - Venanyń Hofbýrg Saraıynda Qazaqstan Respýblıkasynyń Táýelsizdik kúni merekesine jáne EQYU-ǵa qazaqstandyq tóraǵalyqtyń aıaqtalýyna oraı kontsert uıymdastyrylyp, saltanatty qabyldaý ótti.
Bul týraly Syrtqy ister mınıstrliginiń baspasóz qyzmetinen habarlady.
EQYU-nyń Іs basyndaǵy tóraǵasynyń arnaýly elshisi, Syrtqy ister mınıstrniń orynbasary Konstantın Jıgalov jınalǵan qaýymnyń aldynda sóz sóıledi. Onda arnaýly elshi EQYU-nyń qatysýshy-memleketterine jáne atqarýshy qurylymdaryna tóraǵalyq jyly barysynda Qazaqstanǵa kórsetken qoldaýlary, sondaı-aq Uıymnyń Astanadaǵy Sammıtine belsendi qatysyp, tabysty ótkizgendikteri úshin rızashylyǵyn bildirdi.
Budan bólek, kesh barysynda saltanatty jaǵdaıda Qazaqstan Prezıdenti N. Nazarbaevtyń atynan EQYU Bas hatshysy Mark Perren de Brıshamboǵa «Dostyq» ordeni tabys etildi.
Uıymnyń Bas hatshysy óziniń jaýap sózinde, Qazaqstandy EQYU-ǵa jemisti ári naǵyz tarıhı tóraǵalyq jasaýymen quttyqtady jáne ózine tabys etilgen nagradanyń Astana Sammıttin ótkizý men ony EQYU úshin úlken jetistik etý barysyna atsalysqandardyń barlyǵyna arnalǵanyn aıtty.
Kesh qonaqtaryna Qazaqstan óner sheberleriniń kontserttik baǵdarlamasy usynylyp, onda «Kerýlen» folklorlyq ansambliniń, ártister Elmıra Jańabergenovanyń, Aıgúl Úlkenbaevanyń, Nurjan Janpeıisovtyń, Gúlzıra Bókeıhannyń, Ánel Nurseıitovanyń, Medet Shotabaevtyń, Juldyz Tútebaevanyń, Aıda Aıýpovanyń oryndaýynda halyq ánderi, qazaq jáne eýropa avtorlarynyń klassıkalyq týyndylary sharyqtap shyrqaldy.
