Venada atom energetıkasy men ıadrolyq medıtsınany damytý baǵyttary talqylandy
TOKIO. KAZINFORM – Qazaqstan men AEHA 2026–2029 jyldarǵa arnalǵan yntymaqtastyqtyń Jol kartasyn talqylady. Bul týraly Atom energııasy jónindegi agenttigi habarlady.
Atom energııasy jónindegi halyqaralyq agenttiktiń (AEHA) shtab-páterinde (Vena q., Aýstrııa) Qazaqstan Respýblıkasynyń Atom energııasy jónindegi agenttigi tóraǵasynyń orynbasary Ǵumar Serǵazın bastaǵan qazaqstandyq delegatsııa men AEHA Bas dırektorynyń orynbasary Hýa Lıýdiń kezdesýi ótti. Delegatsııa quramyna Atom energııasy jónindegi agenttiginiń, QR Syrtqy ister mınıstrliginiń jáne Ulttyq ǵylymı onkologııa ortalyǵynyń (UǴOO) ókilderi kirdi.
Kezdesý barysynda Qazaqstan men AEHA arasyndaǵy yntymaqtastyqtyń qazirgi jaı-kúıi men damý perspektıvalary, sonyń ishinde 2026–2027 jáne 2028–2029 jyldarǵa arnalǵan tehnıkalyq yntymaqtastyq baǵdarlamalary tsıklderi aıasyndaǵy ózara is-qımyl josparlary talqylandy. Kezdesýde qazaqstandyq tarap 2025 jylǵy qyrkúıekte ótken AEHA-niń 69-shy Bas konferentsııasy barysynda Atom energııasy jónindegi agenttiginiń tóraǵasy Almasadam Sátqalıev pen AEHA-niń Bas dırektory Rafael Marıano Grossıdiń arasynda qol jetkizilgen ýaǵdalastyqtardyń nátıjesinde ázirlengen yntymaqtastyqtyń Jol kartasy jobasyn tanystyrdy.
Jol kartasy jobasynda atom energetıkasyn qaýipsiz damytý jáne retteýdi kúsheıtý, adamı resýrstardy damytý, ǵylymı jáne oqý ınfraqurylymyn jetildirý, ıadrolyq medıtsınany qoldaný aıasyn keńeıtý, sondaı-aq qorshaǵan ortany qorǵaý, klımattyń ózgerýi, azyq-túlik qaýipsizdigi, veterınarııa jáne sý resýrstary salalaryndaǵy is-sharalardy iske asyrýdy qamtıtyn basym baǵyttar kózdelgen.
Atom elektr stantsııalaryn salý jáne ıadrolyq ınfraqurylymdy damytý bóliginde qazaqstandyq tarap ulttyq retteýshi organdy kúsheıtý, sondaı-aq atom elektr stantsııalaryn jobalaý, salý jáne paıdalaný úshin normatıvtik-quqyqtyq bazany ázirleý jáne beıimdeý máselelerinde AEHA tarapynan odan ári qoldaýdyń qajettigin atap ótti.
AEHA -men ótken kezdesýdiń qorytyndysy boıynsha Jol kartasy jobasyn taldaý jáne usynymdar ázirleý úshin AEHA jumys tobyn qalyptastyrýdy qosa alǵanda, aldaǵy qadamdar aıqyndaldy.
Qazaqstanda ıadrolyq medıtsına men onkologııalyq kómekti damytý máselelerine erekshe nazar aýdaryldy. Qazaqstan Respýblıkasynyń Vena qalasyndaǵy halyqaralyq uıymdar janyndaǵy turaqty ókildiginiń qoldaýymen 17–18 jeltoqsan aralyǵynda Atom energııasy jónindegi agenttiginiń, QR Syrtqy ister mınıstrliginiń jáne UǴOO qyzmetkerleri úshin AEHA-niń salalyq departamentterimen úılestirý kezdesýleri uıymdastyryldy. Kezdesýler barysynda qazaqstandyq delegatsııa negizgi taqyryptyq baǵyttar boıynsha usynymdar aldy. Densaýlyq saqtaý dıvızıonynyń dırektory Meı Abdel Vahabpen ótken talqylaýlar UǴOO men AEHA arasyndaǵy ıadrolyq medıtsınany damytý salasyndaǵy yntymaqtastyq baǵyttaryn aıqyndaýǵa múmkindik berdi. Tehnıkalyq yntymaqtastyq baǵdarlamalaryn basqarý jónindegi qyzmetkerlermen ótken kezdesýlerde aǵymdaǵy yntymaqtastyq máseleleri túsindirilip, ıadrolyq medıtsına salasyndaǵy perspektıvaly ulttyq tehnıkalyq yntymaqtastyq jobalary belgilendi.
Sapar barysynda qazaqstandyq tarapqa atom energııasyn beıbit maqsatta tıimdi damytý úshin qajetti ınstıtýtsıonaldyq, quqyqtyq jáne uıymdastyrýshylyq tetikterdi tereńirek túsinýge múmkindigi berildi. Óz kezeginde AEHA osy saladaǵy Qazaqstannyń bastamalaryn iske asyrýǵa jan-jaqty qoldaý kórsetýge daıyn ekenin rastady.
Aıta ketelik beıbit atom, «Aqyldy qala», jahandyq saýda standarty: qazaq-japon kelissózi qaı baǵytta órbıtini týraly jazǵan edik.