Venada alǵashqy ushatyn kóliktiń tusaýy kesildi - FOTO/VIDEO
ASTANA. QazAqparat - Avstrııalyq "Aeromobil" kompanııasy Venada ótken «Pioneers Festival» konferentsııasynda alǵash ret jańa ushý qabiletine ıe "Flying Roadster 3.0" kóliginiń tusaýyn kesti, dep jazady Massaget.kz.
Bul áýekóliktiń prototıpi, shamamen, 25 jyl buryn jasalynǵan. Qazirgi tańda transport quraly baıqaý synaǵynda tur. Bul jańalyqtyń avtory - burynda BMW jáne «Audi» avtomekemesinde jumys jasaǵan, qazir «Aeromobil» kompanııasynyń bas-dızaıneri Stefan Klıaın. «Flying Roadster» túzý jolda, orta eseppen alǵanda, 160 km/saǵatpen júrse, kókke kóterilgen soń 200 km/saǵattan astam jyldamdyqpen usha alady.
Kólik qurastyrýshylardyń sózine qaraǵanda, bul áýekólik, negizinen, transport júıesi álsizdeý elderge arnalǵan. Joba áli de kóptegen tolyqtyrýdy qajet etkendikten, jappaı óndiriske qaı ýaqytta shyǵatyny ázirge belgisiz.
"Flying Roadster" týyndysynyń eń negizgi aıyrmashylyǵy, onyń kóleminiń kishiliginde. Qarapaıym kólikter júretin qara jolǵa emin-erkin syıady. Sondaı-aq, kólik turaǵyna esh qıyndyqsyz qoıýǵa bolady. Ushatyn kólik saǵatyna 15 lıtr janarmaı jaǵady eken. Óndirýshiler qaýipsiz ushý qurylǵylarynyń sapasynyń myqtylyǵyna kepildik berip, senim bildirip otyr.
Ókinishke qaraı, ushqysh kólik ıesine jol keptelisinen qashyp qutylýyna kómektese almaıdy. Áýege kóterilýi úshin 50 metrlik asfaltty jol nemese qarapaıym shópti alqap qajet.
