Venada AEHA Bas konferentsııasynyń 65-shi jyl saıynǵy sessııasy ótip jatyr
Baspasóz qyzmetiniń málimetterine qaraǵanda, AEHA Bas konferentsııasynyń jumysyna jyl saıyn Agenttikke 135-ten astam múshe memleketterdiń, halyqaralyq jáne úkimettik emes uıymdardyń 2000-nan astam ókili qatysady.
Sessııa barysynda delegattar atom salasyndaǵy strategııalyq máselelerdi talqylaıdy. Máselen, AEHA Bas konferentsııasynyń 65-shi sessııasynyń plenarlyq otyrysy barysynda qatysýshylar ıadrolyq jáne radıatsııalyq qaýipsizdikti qamtamasyz etý, tehnıkalyq yntymaqtastyq máselelerin, sondaı-aq COVID-19-ǵa qarsy kúres boıynsha qabyldanyp jatqan sharalardy jáne basqalardy qaraıdy.
Konferentsııa jumysyna QR Energetıka mınıstrliginiń, QR Syrtqy ister mınıstrliginiń, «Qazaqstan Respýblıkasynyń Ulttyq ıadrolyq ortalyǵy» RMK, «Qazatomónerkásip» UAK» AQ jáne t.b. ókilderi qatysady.
Qazaqstandyq delegatsııa músheleri AQSh, Ońtústik Koreıa áriptesterimen, sondaı-aq AEHA Bas dırektory Rafael Marıano Grossımen jáne AEHA qurylymdyq bólimsheleriniń ókilderimen ekijaqty kezdesýler ótkizýde.
«Sessııa barysynda Qazaqstan Respýblıkasynyń Ulttyq ıadrolyq ortalyǵy men Úndistan Respýblıkasynyń atom-energetıkalyq áriptestiginiń jahandyq ortalyǵy arasynda Memorandýmǵa qol qoıý rásimi ótti. Qujatta atom energııasyn beıbit maqsatta paıdalaný salasyndaǵy ǵylymı-tehnıkalyq yntymaqtastyq kózdelgen»,-delingen QR Energetıka mınıstrliginiń baspasóz qyzmetiniń habarlamasynda.
