Vena mýzeıinen 600-den astam gaýhar tasy bar alqa urlandy
ASTANA. KAZINFORM – Eki er adam Venadaǵy mýzeıden kúndiz 600-den astam gaýhar taspen kómkerilgen, quny 4 mln dollardan asatyn platına alqany urlap ketti. Polıtsııa kúdiktilerdi izdestirip jatyr, dep habarlaıdy BBC.
Beısenbi kúni tústen keıin eki kúdikti Vena qoldanbaly óner mýzeıindegi (MAK) shyny vıtrınany syndyryp, 600-den astam gaýhar taspen bezendirilgen platına alqany alyp ketken. Onyń quny 4 mln dollardan asady dep boljanyp otyr.
Burynǵy Mysyr koroldik otbasy úshin jasalǵan áshekeı mýzeıde qyrkúıekke deıin ótetin Van Cleef & Arpels zergerlik kompanııasynyń kórmesine qoıylǵan.
Urlyqtan keıin kúdiktiler mýzeıdiń ońtústiginde ornalasqan Vena qalalyq saıabaǵyna qaraı qashqan. Polıtsııa málimetinshe, kúdiktilerdiń birinde atys qarýy bolýy múmkin.
Quqyq qorǵaý organdary betperdesiz júrgen eki er adam túsip qalǵan beınebaqylaý kamerasynyń kadrlaryn jarııalady. Polıtsııa olardyń qaıda júrgeni nemese urlyqtyń mán-jaıy týraly qandaı da bir aqparat biletin azamattardy quqyq qorǵaý organdaryna habarlasýǵa shaqyrdy.
Kúdiktilerdi izdeý halyqaralyq operatsııa aıasynda júrgizilip jatyr.
Venadaǵy bul oqıǵa Eýropada qundy jádigerler qoldy bolǵan kezekti atyshýly mýzeı urlyǵy boldy.
Buǵan deıin Bonndaǵy mýzeıden jasy bir mıllıard jylǵa deıin jetetin 100-den astam eksponat urlanǵan edi. Sondaı-aq Sıtsılııadaǵy mýzeıden Madonna men Hrıstos beınelengen kartınalar qoldy bolǵan.
