Vena kóshelerinen shabyt aldyq: Astanada 1,4 shaqyrymdyq syrǵanaq salynyp jatyr
ASTANA. KAZINFORM — Qarasha aıynyń ortasynda Astanadaǵy «Lıneınyı» saıabaǵynda ASTANA WINTER PARK jobasy ashylady. Qysqy parktiń jalpy aýdany 6 myń sharshy metrge jýyqtasa, muz aıdyny 1,4 shaqyrymǵa jetedi. Bul týraly Astana qalalyq ýrbanıstıka ortalyǵy habarlady.
— Jobanyń basty ereksheligi — muz aıdynynyń tutas saıabaq aýmaǵyn boılap ótýinde. Bul úshin 1,4 shaqyrym bolatyn arnaıy muzdatqysh joldar jasalyp jatyr. Osylaısha qala turǵyndary qysta serýendep qana qoımaı, muz ústinde syrǵanaýǵa da múmkindik alady, — dep jaýap berdi Ýrbanıstıka ortalyǵy agenttik tilshisine.
Jańa qysqy qalashyq Abu Dhabi Plaza saýda ortalyǵynyń mańynda ornalaspaq. Onda elorda turǵyndary men qonaqtaryna jyly pavılondar, konkı jalǵa berý oryndary, demalys jáne jylyný aımaqtary usynylady. Saıabaq aýmaǵy merekelik jaryqtarmen bezendirilip, jańajyldyq kompozıtsııalar men sýretke túsetin rekvızıtter ornatylady. Ortalyq basshysynyń aıtýynsha, otbasymen demalýǵa qolaıly jaǵdaı jasaýǵa erekshe mán beriledi.
— Jobanyń tujyrymdamasyna Eýropa qalalarynyń, ásirese muz ústinde uzaq syrǵanaýǵa múmkindik beretin baǵyttarymen tanymal Venanyń tájirıbesi negiz boldy. Dástúrli muz aıdynynan aıyrmashylyǵy — munda kelýshiler konkımen serýendeı alatyn ózara jalǵasqan muz joldary jasalady. Aýmaq merekelik arkalarmen, gırlıandalarmen, jańa jyldyq áshekeılermen jáne taqyryptyq fotozonalarmen tolyqtyrylady, — deıdi ortalyq.
Osylaısha ortalyq qysqy demalysqa arnalǵan, barshaǵa qoljetimdi keńistik qalyptastyrýdy kózdep otyr. Qazir kelýshilerge qyzmet kórsetý, saıabaqqa kirý tártibi jáne qosymsha qyzmetter usyný sharttary sekildi uıymdastyrý máseleleri pysyqtalýda. Tolyq aqparat saıabaqtyń ashylýyna qaraı jarııalanady.
— ASTANA WINTER PARK qysqy maýsym boıy jumys isteıdi. Saıabaqty 2026 jylǵy qarashanyń ortasynda ashyp, alǵashqy maýsymdy 2027 jylǵy 31 naýryzda aıaqtaý josparlanyp otyr. Bul rette Lıneınyı saıabaqtyń ózi jyl boıy qoǵamdyq keńistik retinde jumysyn jalǵastyrady. Aldaǵy ýaqytta qysqy muz saıabaǵyn jyl saıyn uıymdastyrý kózdelip otyr, — dedi Ýrbanıstıka ortalyǵy.
Muzdyń sapasyn qamtamasyz etý úshin zamanaýı ınjenerlik júıeler, arnaıy salqyndatý jabdyqtary jáne muz quıý tehnıkasy qarastyrylǵan. Al nysandy aldaǵy ýaqytta paıdalaný jáne kútip ustaý máseleleri áli de qarastyrylyp jatyr. Basty basymdyq — kelýshilerdiń qaýipsizdigi men jaılylyǵy jáne nysanǵa tıisti tehnıkalyq qyzmet kórsetý.
Eske sala ketsek, Memleket basshysy Astananyń Ýrbanıstıka ortalyǵynyń tájirıbesin ózge óńirlerge de engizýdi tapsyrǵan edi.
