«Vena-Eýropa júregi» jalpyulttyq saýalnama-baıqaýy aıaqtaldy
ASTANA. Tamyzdyń 23-i. QazAqparat /Qanat Mámetqazyuly/ - QR Syrtqy ister mınıstrliginiń Halyqaralyq aqparat komıteti, Avstrııanyń Qazaqstandaǵy Elshiligi, «Avstrııa áýe joldary» jáne Qazaqstan Fýtbol federatsııasy birlese júzege asyrǵan «Vena-Eýropa júregi» atty jalpyulttyq saýalnama-baıqaýy óz máresine jetti.
Esterińizge sala keteıik, shara aǵymdaǵy jylǵy shildeniń 27-isinde jarııalanǵan bolatyn. Oǵan qatysý úshin nıet bildirýshi azamat Vena qalasy, «Avstrııa áýe joldary», otandyq jáne eýropalyq fýtbol, EQYU-nyń qyzmeti jáne oǵan Qazaqstannyń tóraǵalyq etýine qatysty qarapaıym 15 suraqqa durys jaýap berý qajet bolatyn. Suraqtar men olarǵa jaýaptardyń nusqalary elimizdiń jetekshi sporttyq jáne qoǵamdyq-saıası BAQ-tarynda, ınternet-portaldarynda, sondaı-aq Qazaqstan Fýtbol federatsııasynyń saıtynda ornalastyrylǵan bolatyn. SІM Halyqaralyq aqparat komıteti tóraǵasy Roman Vasılenkonyń aıtýynsha, baıqaý sharasy boıynsha Fýtbol federatsııasyna 671 hat kelip túsken. Bulardyń arasynan durys jaýap berilmegen, durys rásimdelmegen 378 ótinish alynyp tastaldy.
Sonymen birge, fýtboldan Qazaqstan ulttyq quramasynyń oıynshysy Sergeı Ostapenkonyń qatysýymen jeńimpazdar arasynda júlde utysy ótkizilip, ol boıynsha 11 kádesyı toptamasy, Qazaqstan ulttyq quramasynyń oıynshylary qol qoıǵan úsh teńbil dop, EQYU logotıpteri beınelengen keýdesheler tapsyryldy. Al bas júldeni Petropavl qalasynyń turǵyny Murat Japarov ıelendi. Endi jeńimpaz «Avstrııa áýe joldary» kompanııasy usynǵan «Astana-Vena-Astana» baǵyty boıynsha eki adamǵa ushý bıletterine jáne qyrkúıektiń 6-10 aralyǵynda Venadaǵy qonaq úıde bes kún turý múmkindigine ıe bolyp otyr. Bundaı utys baǵdarlamasynyń ishinde mindetti túrde Qazaqstan men Avstrııa quramalarynyń oıynyn stadıonnan tamashalaý sharasy qamtylǵan. Qyrkúıektiń 7-isinde ótetin oıynǵa bıletti Qazaqstan fýtbol federatsııasy usynǵan.
