Velojoldar men Almaty Bike: megapolıste veloınfraqurylym qalaı damymaq
ALMATY. KAZINFORM — Almatyda aldaǵy jyldary veloınfraqurylymdy damytý boıynsha jumystar jalǵasady.
Qalalyq mobıldilik basqarmasynyń málimetinshe, búgingi kúni Almaty qalasynda 89,8 shaqyrym veloınfraqurylym bar. Onyń ishinde: velojolaqtar — 25,6 km, velojoldar — 64,2 km.
Odan bólek qala boıynsha velo-sektsııasy bar 73 baǵdarsham jáne velosıpedshilerge arnalǵan 1025 jol belgisi bar.
— Qazirgi tańda bul baǵyttaǵy jumystar óz jalǵasyn tabýda. Máselen, Almaty qalasy damýynyń 2027 jylǵa deıingi bas josparyna sáıkes, aldaǵy jyldary uzartý josparlanǵan Saın kóshesi, Tóle bı kóshesi, Abaı dańǵyly, Jubanov kóshesi, Rysqulov dańǵyly, Tilendıev kóshesi, Soltústik aınalma kóshesi, Muqanov kóshesi, Hmelnıtskıı kóshesi, Raıymbek dańǵylynda joba aıasynda tıisti veloınfraqurylym qarastyrylatyn bolady, — delingen basqarma jaýabynda.
2024 jyly Saın - Móńke bı jolaıryǵynyń qurylysy aıasynda 2,4 km velojol salynǵan. 2025 jyly Abaı dańǵylyn jáne Saın kóshesin uzartý jumystary aıasynda 7,2 km salý josparlanǵan.
Sondaı-aq Raıymbek batyr dańǵyly boıynsha BRT jelisin salý jumystary aıasynda shamamen 15 km velojol salynady.
Almaty qalasy boıynsha Velosport federatsııasynyń prezıdenti Bahtııar Mamyrov megapolıste velosıpedshiler kóbeıip kele jatqanyn atap ótti. Sondyqtan onyń aıtýynsha, qalada kóshelerinde velojoldardy kóbeıtý qajet.
— Almatyda sońǵy 5 jylda velosıpedpen júretin adamdardyń sany aıtarlyqtaı artty. Oǵan qala joldaryndaǵy keptelis, adamdardyń salaýatty ómir saltyna kóshýi, saıabaq pen qala kóshelerinde velojoldardyń artýy sebep boldy dep oılaımyn. Degenmen, Almatyda Eýropanyń kez kelgen qalasymen salystyrǵanda veloınfraqurylym áli de az, velojoldardy kóbeıtý kerek. Al eki dóńgelekti kólikke arnalǵan joldardyń sapasyn 5 baldyq eseppen 3 dep baǵalar edim, — dedi Almaty qalasy boıynsha Velosport federatsııasynyń prezıdenti Bahtııar Mamyrov.
Aıta ketken jón, megapolıste velosıpedshilerdiń kóbeıýimen qatar olardyń qatysy bar jol apattarynyń sany da artqan. Almaty qalasy Polıtsııa departamentiniń málimetine sáıkes, 2024 jyly Almatyda velosıpedshiler 60 jol-kólik oqıǵasyna ushyraǵan jáne saldarynan 58 adam jaraqat alǵan. Bul jol-kólik oqıǵalarynda qaıtys bolǵan adamdar joq.
Almaty Bike qaıta iske qosyla ma
Buǵan deıin megapolıste Almaty Bike velosıpedterdi jalǵa berý qyzmeti nelikten toqtap turǵanyn jazǵanbyz.
2024 jyly Almaty Bike jumysyn qamtamasyz etý úshin Qalalyq mobıldilik basqarmasy memlekettik satyp alýǵa 3 konkýrs ótkizgen. Alǵashqy eki baıqaý qyzmet kórsetýshilerdiń bolmaýyna baılanysty toqtatylǵan.
Al úshinshi konkýrstyń qorytyndysy boıynsha jeńimpaz bolyp «Geo Proekt Injınırıng» JShS anyqtalyp, 4 qazan kúni qyzmet kórsetýge shart jasalǵan. Alaıda 21 qazan kúni atalǵan uıymmen jasalǵan shartty jaramsyz dep taný týraly Almaty qalasynyń mamandandyrylǵan aýdanaralyq ákimshilik sotyna talap-aryz joldanyp, sot talqylaýlary bastaldy.
Kazinform agenttigi bul máselege baılanysty jaýapty vedomstvoǵa taǵy da saýal joldady. Qalalyq mobıldilik basqarmasy bul júıeni odan ári damytý «Almaty Parkıng» mekemesine júktelgenin habarlady.
— Qazirgi ýaqytta «velosherıng», velosıpedterdi jalǵa berý áleýmettik júıesin odan ary damytý maqsatynda elektr-velosıpedterge kóshý máselesi qarastyrylyp jatyr. Sol sebepten osy jylǵa Almaty Bike júıesin ustaýǵa tıisti qarajat qarastyrylmaǵan bolatyn. Bul júıeni odan ári damytý «Almaty Parkıng» mekemesine júkteledi, — delingen vedomstvo jaýabynda.
Óz kezeginde agenttik saýalyna jaýap bergen «Almaty Parkıng» mekemesi aldaǵy ýaqytta 2 myń elektr-velosıpedti qala kóshelerine shyǵarýdy josparlap otyrǵanyn málimdedi.
— Velosıpedterdi jalǵa alý júıesi ony paıdalanýshylarǵa qaladaǵy qozǵalystyń qoljetimdiligin qamtamasyz etedi. Osy joba úshin Almaty qalasynyń kommýnaldyq menshiginde bolatyn baǵdarlamalyq qamtamasyz etý júıesin ázirleý josparlanyp otyr. Jobada PAS júıesi bar elektrlik velosıpedter bolady, munda pedaldiń qarqyndylyǵy velosıpedtiń qozǵalysyn qamtamasyz etedi jáne gaz tutqasy bolmaıdy. Aıtylǵan jobany 2000 elektr-velosıpedpen iske qosý josparlanǵan. Degenmen, bolashaqta olardyń sany ulǵaıýy da múmkin, — dep habarlady «Almaty Parkıng».
Eske salaıyq, buǵan deıin Almatyda osy jyly jol ınfraqurylymyna baılanysty qandaı jobalar bastalatynyn jazǵanbyz.