Velojarystardaǵy jeńimpazdyń syıaqysy komanda múshelerine teń bólinedi - A. Shefer
ALMATY. QazAqparat - Halyqaralyq velojarystarda jeńiske jetken jeńimpazdyń syıaqysy komanda múshelerine teń bólinedi. Bul týraly «QazAqparat» tilshisine «Astana Pro Team» komandasynyń sport dırektory Aleksandr Shefer málimdedi.
«Ádette halyqaralyq dárejedegi barlyq velojarystarda jeńiske arnalǵan syıaqy tek jeńimpazǵa berilip qoımaıdy. Aldymen onyń 15 paıyzy qyzmet kórsetýshi quramǵa beriledi. Olardyń arasynda mehanıkter, massaj jasaýshylar, dárigerler jáne basqa da tulǵalar bar. Al qalǵan soma, ádil bolýy úshin jarysqa qatysqan komanda múshelerine teń bólinedi. Óıtkeni, velojarystardaǵy jeńiske búkil komanda atsalysady», - dedi A. Shefer.
Aıta ketelik, «Astana Pro Team» komandasynyń veloshabandozy Alekseı Lýtsenko Halyqaralyq «Almaty týry-2015» velojarysynda osymen ekinshi ret jeńise qol jetkizdi. Onyń kórsetkishi - 4 saǵat 13 mınýt 09 sekýnd.
Al ótken jylǵy jarysta ol 186 shaqyrymdyq qashyqtyqty 4 saǵat 12 mınýt 17 sekýndta basyp ótken bolatyn.
Ekinshi orynda Fabıo Arý - «Astana Pro Team» komandasynyń veloshabandozy. Al Katusha (Reseı) velokomandasynyń sańlaǵy Pavel Kochetkov úshinshi orynǵa ıe boldy. Jeńimpazǵa 15 myń eýro tabys etildi. Ekinshi jáne úshinshi oryn alǵandar sáıkesinshe 10 myń jáne 5 myń eýroǵa ıe boldy.
Byltyr aýa-raıy salqyndaý, al bıylǵy jarysta kún erekshe jyly boldy. Tań ata bulttar seıilip, kún jarqyraı shyqty. Aýa temperatýrasy 20 gradýstan asty.
