Velotrekten Azııa chempıonaty: El qorjyny taǵy bir medalmen tolyqty

ASTANA. KAZINFORM – Búgin Úndistan astanasy Delıde ótip jatqan velotrekten eresekter arasyndaǵy 43-shi Azııa chempıonatynda Qazaqstan qorjyny taǵy bir medalmen tolyqty.

QR Sport jáne dene shynyqtyrý komıteti málim etkendeı, «Medıson» jarysynda elimizdiń erler quramasy (Álisher Jumaqan men Ramıs Dinmuhametov) qola júldege ıe boldy.

Bul Álisher men Ramıstiń Delıdegi osy chempıonattaǵy alǵashqy júldesi emes. Birneshe kún buryn upaı jınaý jarysynda Álisher kúmis, al toptan tys qalý básekesinde Ramıs qola medalǵa qol jetkizgen bolatyn.

Osydan keıin ótken «keırın» baǵdarlamasynda Ulttyq quramanyń qos sportshysy TOP-10-dyqqa kirdi. Sergeı Ponomarev 9-shy, Andreı Chýgaı 10-orynǵa turaqtady.

Qazir Qazaqstan quramasynyń qorjynynda 1 kúmis, 4 qola medal bar. Sary qurlyq dodasyna bıyl 23 eldiń úzdikteri jınalyp, ózara myqtyny anyqtap jatyr. Atalǵan birinshilikte elimizdiń namysyn 9 sportshy qorǵap jatyr. Azııa birinshiligi erteń, ıaǵnı 26 aqpanda máresine jetedi.