Velotrek: Silk Way Series Astana týrnıriniń birinshi kezeńi máresine jetti

Eki kún boıy elorda tórinde jarysqan sportshylar CL2 sanatyndaǵy reıtıngilik týrnırde upaı jınaýǵa tyrysqan bolatyn. Bul syn qazaqstandyq shabandozdar úshin sátti ótýde

Atalǵan týrnırde jınaǵan upaı sportshylardyń álem kýbogy kezeńderine joldama alýyna múmkindik beredi. Sondaı-aq, Olımpıada oıyndaryna lıtsenzııa ıelener tusta da bul jarystyń mańyzy zor. Óz jerimizdegi dúbirli synǵa ulttyq qurama tolyq qurammen qatysty. Atap aıtar bolsaq, Pavel Vorjev, Artem Zaharov, Maksım Naletov jáne Álisher Jumaqandar el namysyn qorǵady.

Búgingi jarys kúninde Álisher Jumaqan «skretchten» top jarsa, osy qashyqtyqta Sultanmurat Mirálıev kúmiske qol sozdy. Pavel Vorjev «keırınde» úzdik úshtikke endi. «Keırın» naǵyz myqtylardyń synalar jeri. Bul básekede kópshilik altyn júldeni ulybrıtanııalyq sportshy, Olımpıadanyń alty dúrkin jeńimpazy Djeıson Kennı alaryna senimdi bolǵan. Alaıda, álem birinshiliginde úzdikter qataryna enip júrgen reseılik Pavel ıAkýshevskıı chempıonnyń aldyn orap ketti.

Toptyq jarysta bizdiń komanda múshesi Asylhan Turarǵa teń keler eshkim bolǵan joq.

Osylaısha, búgin bizdiń sportshylar tórt medal jeńip aldy. Keshegi jarys kúninde Artem Zaharov «omnıýmnan» altyn alǵanyn habarlaǵanbyz. Jalpykomandalyq esepte Qazaqstan Qytaıdy alǵa jiberip, ekinshi oryn ıelendi.

«Bul jarysta bizdiń aldymyzda bir ǵana mindet turdy. Meılinshe kóbirek upaı jınaýdy oıladyq. Atalǵan upaılar aldymen komandalyq synǵa, keıin Olımpıada oıyndaryna irikteý kezeńinde qajet bolady. Jigitter óz mindetterin oıdaǵydaı oryndap shyqty. Árıne, eń negizgi baǵdarlama - omnıýmnan Zaharovtyń altyn alyp, álemdik reıtıngtegi jaǵdaıyn jaqsartqany qýantady. Sondaı-aq, «skretch» pen toptyq jarysta jigitterdiń asyǵy alshysynan tústi. Erteń demalys, sodan soń joǵary sanatty týrnır bastalady. Óz bıigimizden túspeýge tyrysamyz», - deıdi komanda bas bapkeri Vladımır Býshanskıı.