Velosporttan úsh dúrkin álem chempıony óz-ózine qol jumsady
ASTANA. QazAqparat - Velosporttan úsh dúrkin álem chempıony amerıkalyq Kellı Ketlın 23 jasynda ózine-ózi qol jumsady. Bul jaıly sportshynyń ákesi Mark Ketlın jeksenbi kúni VeloNews basylymyna habarlady.
Veloshabandozdyń denesi juma kúni keshkisin onyń Kalıfornııadaǵy úıinen tabylǵan. «Bizdiń ol jáne onyń jarqyn bolashaǵy jaıly oılamaǵan sátimiz bolǵan emes. Orny tolmas qaıǵyǵa ushyradyq», - dedi Mark Ketlın. Ol qyzynyń óz-ózine qol jumsaý sebebin aıtýdan bas tartty.
AQSh velosporty federatsııasynyń (USA Cycling) tóraǵasy Bob Demartını jeksenbide jarııalanǵan málimdemesinde velosıpedshiniń kóz jumǵanyn rastady.
Kellı Ketlın 2016, 2017 jáne 2018 jyldardaǵy álem chempıonattarynda áıelder komandalary arasynda altyn medal jeńip aldy.
2016 jyly Rıo-de-Janeıroda ótken Olımpıadada ol amerıkalyq quramanyń múshesi bolyp kúmis júlde ıelengen.
