Velosporttan Qazaqstan quramasy jasóspirimder olımpıadasynda jeńimpaz atandy
ASTANA. QazAqparat - Velosporttan Qazaqstan erler komandasy Býenos-Aıreste ótip jatqan jasóspirimder Olımpıadasynyń chempıony atandy dep habarlaıdy Olympic.kz.
Gleb Brýsenskıı men Evgenıı Fedorov bes kezeńge sozylǵan keshendi jarysta kósh tizginin eshkimge bergen joq.
Búgin maýntınbaıkten ótken krıterıým jarysynda Gleb Brýsenskıı ekinshi oryn ıelenip, komanda qorjynyna 80 upaı saldy.
Evgenıı Fedorov ta upaısyz qalǵan joq. Ol altynshy orynnan kórinip, 30 upaıǵa qol jetkizdi.
Osylaısha, Qazaqstan komandasy jalpy esepte 418 upaı jınap, altyn medal ıegeri atandy. Kúmis júldeger atanǵan Lıýksembýrg quramasynda 276, qola júlde ıelengen Ulybrıtanııada 253 upaı bar.
«Biz ári ketse úzdik úshtikke enemiz degen maqsat qoıǵan edik. Alaıda, áleýetemiz odan da jaqsy ekenine kóz jetkizdik. Altyn medal alýǵa múmkindik baryn sezgen soń, ózimizdi qamshylaýmen boldyq. Qazirgi kóńil-kúıimizdi sózben jetkizý múmkin emes. Shyny kerek, maýntınbaık bizge qıyn soqty. Onyń ústine, búgin jarys kezinde velosıpedimniń otyrǵyshy synyp ketti. Abyroı bolǵanda bári durys boldy», - deıdi Brýsenskıı.
«Qarsylastarymyzdy alǵa jibermeýge tyrystyq. Bizdi ókshelep kele jatqan Lıýksembýrg sportshylaryn erekshe baqylaýda ustadyq. Úzdik úshtikke enemiz dep kelgen edik, altynmen oralǵaly turmyz. Bizdiń jeńisimizge septigin tıgizgen jandarǵa alǵysym zor. Bapkerimizge barsha aqyl-keńesi úshin bas ıemiz», - dedi Fedorov.
