Velosporttan ACh: Alǵashqy kúni Qazaqstan quramasynda qos altyn
ASTANA. QazAqparat - Búgin Mıanma astanasy Neıpıdo qalasynda bastalǵan shossedegi velosporttan Azııa chempıonatynyń alǵashqy kúninde Qazaqstan qorjynyna qos altyn medal tústi, dep habarlaıdy «QazAqparat» tilshisi.
QR velosıped sporty federatsııasynan alynǵan málimetke qaraǵanda, atalmysh dodaǵa Qazaqstannan barlyǵy 16 sportshy qatysýda.
Alǵashqy altyn júldege 18 jasar Danııl Pronskıı ıe boldy. Ol 22,7 km jekeleı jarysta 29 mınýt 21 sekýnd kórsetti.
«Jeńis ońaılyqpen kelgen joq. Kedergiler az bolmady. Mıanmamen ýaqyt aıyrmashylyǵy 30-aq mınýt, sondyqtan aǵza tez úırendi. Biraq munda ystyq 35 gadýsqa deıin jetken. Bul meniń Azııa birinshiligindegi alǵashqy jeńisim emes. 2016 jáne 2017 jyldary da jeńimpaz atanǵanmyn. Erteń komandalastarymmen birge toptyq básekege qatysamyn», dedi D.Pronskıı.
Taǵy bir altyn medal 18 jasar Marına Kýrnosovanyń enshisinde. Ol 11 km jekeleı synda úzdik shyqty. M.Kýrnosova da kúshti jelge qosa kúnniń ystyq ekendigin, jeńý úshin bar kúsh-jigerin salǵanyn, búrsúgúni toptyq jarysqa shyǵatynyn jetkizdi.
Sonymen qatar búgin erler arasyndaǵy elıtalyq sanattaǵy komandalyq jarysqa qazaqstandyqtar qatysyp, besinshi orynǵa taban tiredi.
Aıta keteıik, Azııa chempıonaty 12 aqpanǵa deıin sozylady.
