Velosportta talantty jastar ósip keledi – qyzylordalyq bapker
- Velosportqa qalaı keldiń? Aldymen osy jaıynda toqtala ketkeniń artyq bolmas.
- Jergilikti velosport mektebiniń esigin alǵash ashqanda jetinshi synypta oqıtyn edim. On tórt jasta bolatynmyn. Birden sporttyń qyzyǵyna túsip kettim.
2001 jyly velosport mektebine alǵash kelgende meni jergilikti maman Jetes Súleımenov qarsy aldy. Maǵan birden velosıped bere qoıǵan joq. Eki aıdaı ýaqyt ótkennen keıin tuńǵysh márte jattyǵýǵa qatysýǵa múmkindik aldym. Stadıondy bir aınalyp óttim. Velosıpedti úıge alyp ketýge jarty jyldan keıin ruqsat etti. Bul sátte men oblystyq jarysta top jarǵan edim. Sol jarysta meni Almaty qalasyndaǵy respýblıkalyq daryndy balalarǵa arnalǵan sport-ınternatynda eńbek etetin Vıtalıı Shtyhlın baıqapty. Kóp uzamaı atalǵan sport-ınternatqa qabyldandym.
Daryndylar jınalǵan oqý ordasynda ol alty jyldan astam tálim aldym. Velotrekke qatysty sheberligin jetildirdim. Arada bir jarym jyldaı ótkende sol saıys túrinen qalalyq jarysta júldeli orynnan kórindim.
- Alǵash ret qandaı halyqaralyq jarysta júldegerler qatarynan kórindiń?
- 2004 jyly Japonııanyń Osaka qalasynda ótken Azııa chempıonatynda úzdik úshtikke iliktim. Al 2007 jyly Úndistanda jasóspirimder arasynda qurlyqtyq dodada eki júldege ıe boldym. Aldymen toptyq saıysta birinshi oryn alsam, komandalyq jáne jekeleı synda eki kúmiske qol jetkizdim.
- Bir kezderi halyqaralyq «Astana» veloklýby sapynda oıyn kórsetkenińdi bilemiz. Álemdik velosporttaǵy myqtylardan tálim alyp, mol tájirıbe jınaqtaǵan shyǵarsyń.
- Iá, halyqaralyq «Astana» veloklýbynyń jastar quramynda saıystarǵa qatystym. Álem jankúıerlerine esimi belgili Aleksandr Vınokýrov, Alberto Kontador, Lens Armstrong sekildi úzdiktermen bir komandada baq synap, sheberligin shyńdaýǵa kúsh saldy. Alaıda 2012 jyly túrli sebepterge baılanysty velosportpen qosh aıtystym.
Sol jyly bapkerlik qyzmetke bet buryp, Qyzylorda qalasyndaǵy arnaıy mamandandyrylǵan velosport mektebinde shákirtterge tálim berdi. Eki-úsh jyl elordada qyzmet atqarǵan ol týǵan topyraqqa oraldym. Kezinde ózimniń sheberligimdi shyńdaǵan sport mektebine oblystyń aǵa jattyqtyrýshysy qyzmetine keldim. Naǵyz talanttardy izdep tabýǵa bar kúshimizdi salamyz. Syrt kózge sporttyń bul túri ońaı kórinetin shyǵar. Alaıda onyń qanshama erejesi bar. Balanyń qaýipsizdigi de nazardan tys qalmaıdy. Osylaısha velosportqa kelgen jas órenniń joǵary bıikke jetkenine deıin qanshama eńbek etemiz. Biz de solaı tárbıelenip shyqqanbyz. Sol jeńisti joldy jalǵastyrǵymyz keledi. Ózderińiz biletindeı, Qyzylorda velosport mektebi Álem chempıony atanǵan Marat Satybaldıev, Sergeı Kapýstın sekildi sańlaqtardy tárbıelep shyǵarǵan. Burynǵydaı emes, qazir materıaldyq-tehnıkalyq bazany jaqsartý baǵytynda oń ister bar. Kezinde ózimiz salmaǵy aýyr velosıpedpen jattyǵý jasaıtyn edik. Qazir talapqa saı keletin tehnıka sany molaıdy. Bul shákirtterdiń sheberligin shyńdaýǵa barynsha úles qosady.
Kezinde bizdiń oblysta eki velosport mektebi jumys istegen eken. Odan bergi jyldarda ekeýiniń ornyna arnaıy mamandandyrylǵan mektep talaı órenniń jeńisti jolyna aqjol tiledi. Elimizde velosportty keńinen nasıhattaý isine kóńil bólinse deımin. Oblys ortalyqtarynan bólek aýdandarda da arnaıy úıirmeler ashylsa quba-qup. Sonda talanttardy tabýǵa múmkindik týady,
- Shákirtteriń jaıly ne aıtasyń? Olardyń arasynda álemdik básekelerge qatysyp júrgenderi bar shyǵar.
- Shákirtterimniń sheberligin shyńdaýǵa árdaıym nazar aýdaramyn. Buǵan úlken eńbekqorlyq qajet. Tolaǵaı tabys ońaılyqpen kelmeıdi. Oǵan shydamdylyq, jankeshtilik, jaýapkershilik talap etiledi. Árıne, sportqa jańa kelgen jas óren kóp nárseni túsine bermeýi múmkin. Onyń múmkindigine qaraı velosportqa tárbıelegen artyq emes. Qaı kezde de bizdiń óńirden daryndy jastar shyǵyp keledi. El chempıonatynda, túrli saıystarda top jaryp júr. Mundaı jastar qashan da eleýsiz qalǵan emes. Máselen, Aslan Sılyqbek, Arýjan Raqymjan, Anjela Soloveva syndy shákirtterim Malaızııada jastar arasynda ótetin Azııa chempıonatyna qyzý daıyndyq ústinde. Joǵary jetistikpen oralady degen senimdemin. Olarǵa qoldaý kórsetip, demeý bolýǵa tyrysamyn. Qysqasy, velosportta talantty jastar ósip keledi.
- Qazir álemde velosporttyń damýy jóninen qaı elder alda keledi?
- Dúnıe júzinde velosport jóninen Italııa, Ispanııa, Reseı, Frantsııa sekildi birqatar memleketter alda tur. San alýan saıystarda top jaryp júrgen talanttar úlken eńbektiń arqasynda zor tabysqa jetti. Bul oraıda bapkerlerdiń biliktiligi, materıaldyq-tehnıkalyq bazanyń jaqsarýy oń áserin tıgizedi. Keıingi jyldary elimizde kóptegen ǵımarattar boı kóterdi. Nátıjesinde jas veloshabandozdar sheberligin shyńdap, tolaǵaı tabysqa qol sozdy.
- Elimizde velosporttyń damýyna qandaı qamqorlyq jasalýda?
- Astana qalasyndaǵy trekke arnalǵan sport saraıynda qazir álemdik básekeler ótkiziledi. Jastarymyz da onda jattyǵý jıyndaryn jasap, sheberligin jetildirdi. Búginde halyqaralyq deńgeıdegi túrli jarysta top jaryp júrgen veloshabandozdar - sol ıgilikti istiń naqty kórinisi. Elimiz velosporttyń damýy jóninen álemde óz ornyn enshilep úlgerdi. Bul bizdi qýantady. Endigi kezekte bapker retinde shákirtterimniń joǵary jetistikke jetýine úlken úlesimdi qosa beremin dep oılaımyn.
- Áńgimeńe raqmet.
