Velosıpedpen júrý energııa men taza aýany, densaýlyq pen kóterińki kóńil-kúıdi saqtaıdy - T. Raqymbekov
ASTANA. 30 qyrkúıek. QazAqparat - Búgin Astanda BUU damytý baǵdarlamasy jáne Nıderlandy Koroldiginiń bastamasymen «Energııa únemdeý jáne salaýatty ómir salty úshin» velojarysy uıymdastyryldy.
Oǵan QR Qarjy mınıstri Bolat Jámishev, Nıderlandy Elshisi Peter van Leýven jáne basqa da laýazymdy tulǵalar bastaǵan, stýdentter men mektep oqýshylary jáne qala turǵyndary qostaǵan 100-ge jýyq velosıpedshiler Astana kóshelerimen júrip ótti.
Sharanyń maqsaty - halyqtyń nazaryn energııany únemdeýge aýdarýmen qatar, salaýatty ómir saltyn qalyptastyrýǵa shaqyrý, belsendi demalys jáne qorshaǵan ortany qorǵaý tásilin dáripteý.
«Mundaı sharalar bıylǵy mamyr aıynan bastap elimizdiń túrli qalalarynda uıymdastyrylyp kele jatyr. Astanada osymen úshinshi ret ótýde. Degenmen qalada velosıpedshilerdiń qaýipsizdigin qamtamasyz etetin birde-bir velojol joq. Velosıpedti turaqty kólik túri etkender úshin qala kósheleri qaýipsiz dep aıtý qıyn», - deıdi sharany uıymdastyrýshylardyń biri - «Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ Basqarma tóraǵasy Tóleýtaı Raqymbekov.
Onyń aıtýynsha, atalmysh velojarys qala turǵyndaryna velosıpedpen júrýdiń mańyzdylyǵyn túsindiredi. «Astanada velosıpedpen júrý jyldyń 6 aıynda ǵana múmkin bolsa da, osynyń ózi energııa men taza aýany, densaýlyq pen kóterińki kóńil-kúıdi saqtaýǵa óz úlesin qosary sózsiz», - deıdi T. Raqymbekov.
