Velosıpedpen qajylyqqa bara jatqan ózbekstandyq qazaq polıtseılerine alǵys aıtty
Ózbekstan Respýblıkasynyń 56 jastaǵy azamaty Bozorbaı Satvoldıev velosıpedpen Mekkege qajylyqqa barýǵa jolǵa shyqqan.
Ol Qazaqstan Respýblıkasynyń aýmaǵyna Túrkistan oblysyndaǵy shekara beketi arqyly ótken.
Al, búgin, 20 mamyrda Atyraý oblysy arqyly Mańǵystaý óńirine baǵyt alǵan.
Jolda velosıpedpen ketip bara jatqan ony saǵat 14:30 shamasynda Jylyoı aýdandyq polıtsııa bóliminiń qyzmetkerleri kezdestirgen.
«Jol boıynan velosıpedine Ózbekstan Respýblıkasynyń týyn ilip, sómke asynǵan egde jastaǵy er adamdy baıqadyq. Onymen jón surasyp, Ózbekstan Respýblıkasynyń azamaty Bozorboı Satvoldıev ekenin bildik. Mańǵystaý oblysyna baǵyt alyp barady. Dittegen jeri – Saýd Arabııasyndaǵy Mekkege jetip, qajylyq paryzyn óteý», -deıdi aýdandyq polıtsııa bólimi tergeý bólimshesi bastyǵynyń orynbasary, polıtsııa kapıtany Nurlan Jangelov.
Polıtsııa kapıtany alys jolǵa velosıpedpen shyqqan ózbekstandyq azamatqa jol kórsetip, azyq-túlikpen, qarajatpen qamtamasyz etken.
«Men – Ózbekstan Respýblıkasynyń azamatymyn. Ózbekstan Respýblıkasynan Mekkege qajylyqty paryzymdy óteý úshin velosıpedpen bara jatyrmyn. Maǵan jol kórsetip, kómek berip jatqan Qazaqstan polıtsııasyna rahmetimdi aıtamyn. Qyzmetterińizge sáttilik tileımin, Qazaqstan polıtsııasy jasaı bersin!», -dep alǵysyn bildirdi Bozorboı Satvoldıev.
Eske sala ketelik, budan buryn atyraýlyq ana ıt talaǵan sábıin aýrýhanaǵa jetkizgen polıtseıge alǵys aıtqanyn jazǵan edik.
