Velosıpedpen Qazaqstandy aralaǵan qazaq qyzy
ASTANA. KAZINFORM — Úrimshiden Astanaǵa deıin júrip ótken Búrlen Ádiletqyzy bıyl Qazaqstannyń túkpir-túkpirin aralap, uzaq velosaparyn elordada aıaqtady.
76 kúnge sozylǵan saıahaty barysynda ol 19 qalany aralap, eldiń tabıǵatymen jáne ár óńirdiń tynys-tirshiligimen tanysty. Velosaıahatshy búgin Jibek Joly telearnasynyń «Búgin.LIVE» baǵdarlamasyna qonaq boldy.
Búrlen Ádiletqyzynyń aıtýynsha, onyń alǵashqy sapary Úrimshiden Almatyǵa deıingi baǵytty qamtyǵan. Sol kezde ol tarıhı Otanyna qonys aýdarǵan. Al bıylǵy saparynda Qazaqstannyń óńirlerin aralap, týǵan jeriniń tabıǵatyn jaqynyraq tanyǵan. Onyń sózinshe, eki saıahattyń maqsaty da, áseri de ózgeshe bolǵan.
— Burynnan velosıpedpen uzaq saparǵa shyǵyp júrgen adamdardy jıi kóretinmin. Bir kúni «Qartaıǵanda jastyq shaǵymdy eske alsam, qandaı estelikterim bolady?» degen oı keldi. Sol sátten bastap erekshe áser men umytylmas estelik úshin saıahatqa shyǵýdy uıǵardym. Alǵashqy saparymda Otanyma alǵash ret qonys aýdaryp kelgen edim. Ekinshi saparymda týǵan jerdiń eldiń ár óńirin aralap, jaqynyraq tanydym, — dedi ol.
Búrlen Ádiletqyzy saparyn sáýir aıynda bastap, eki aıdan astam ýaqyt jolda bolǵan. Osy ýaqyt ishinde ol 19 qalany aralap úlgirgen.
— Marshrýtty josparlaǵanda qaı qaladan bastaıtynymdy birden sheshe almadym. Tek sapardyń sońǵy núktesi Astana bolatynyn anyq bildim. Bir aıǵa jýyq oılanyp, joldy Aqtaýdan bastaýdy jón kórdim. Osylaısha eldiń barlyq óńirin qamtýǵa múmkindik týdy. Baǵytym Batystan — Ońtústikke, Ońtústikten — Shyǵysqa, odan Soltústikke, keıin eldiń ortalyǵyna qaraı jalǵasty, — dedi saıahatshy.
Onyń aıtýynsha, Qazaqstannyń ár óńiri ózinshe erekshe. Alaıda Mańǵystaý dalasy oǵan qatty unaǵan eken.
— Mańǵystaýdyń tabıǵaty erekshe áser etti. Shóleıtti dalasynyń ózindik sulýlyǵy bar, joldary da óte jaqsy. Atyraý halqynyń qonaqjaılyǵy tánti etti. Al Oral qalasynyń baı tarıhy qyzyqtyrdy. Osy tusta Batys pen Ońtústik óńir turǵyndaryna erekshe alǵys aıtqym keledi. Olar meni jyly qarsy alyp, qoldan kelgen kómegin aıamady, — dedi Búrlen Ádiletqyzy.
Saıahatshy qazaq halqynyń qonaqjaılyǵyna erekshe rıza bolǵanyn aıtty. Onyń sózinshe, Ońtústik óńir turǵyndary Shyǵys Qazaqstanǵa jetkenge deıingi aıaldaıtyn oryndaryn aldyn ala uıymdastyryp bergen.
— Kún saıyn shamamen 30 shaqty adam toqtap, jaǵdaıymdy surap, kómek usynatyn. Bul maǵan úlken kúsh-jiger berdi. Áleýmettik jelidegi oqyrmandarym da úıine qonaqqa shaqyryp, jol boıynda qoldaý kórsetti. Kúndelikti tańǵy saǵat 4-ten keshki 9–10-ǵa deıin jolda boldym. Maqsatym — bir kúnde kelesi eldi mekenge nemese óńirge jetý. Sondyqtan túndi dalada ótkizgen emespin, — dedi ol.
Uzaqqa sozylǵan sapar barysynda Búrlen Ádiletqyzyna joldan kezdestirgen marǵaýy serik boldy. Ol mysyǵyna «Oral» degen ataý bergen.
— Oral qalasy saparymdaǵy úshinshi aıaldama boldy. Sol jerde joldan bir mysyqty kezdestirdim. Jalǵyz júrgendikten ony ózime serik sanap, «Oral» dep atadym. Onyń taǵy bir sımvoldyq máni bar. Men de tarıhı Otanyma qaıta oralǵan janmyn. Sondyqtan bul ataýdy erekshe yrymdap qoıdym, — dedi Búrlen Ádiletqyzy.
Búrlen Ádiletqyzy sapardaǵy eń úlken qıyndyq fızıkalyq júkteme bolǵanyn aıtty. Velosaıahatty sáýir aıynda bastaǵandyqtan, kóktemgi salqyn jeldiń áserinen tizesi aýyrǵan. Óskemen qalasyna jetkende em qabyldap, keıin jolyn jalǵastyrǵan eken.
Aıta keteıik, «Búgin.LIVE» baǵdarlamasynda BaiQymyz-2026 festıvaliniń jeńimpazy Álııa Qabdýlına da qonaq boldy.
