Velosıped júrgizýshileri jolda júrýde qandaı erejelerdi saqtaýy tıis
NUR-SULTAN. QazAqparat - Osy aptanyń sońynda bas qalada velosıped maýsymy ashylady, osy turǵyda qalalyq polıtsııa departamenti velosıped júrgizýshileri men jaıaý júrginshilerden jolda júrý erejesin qaıta eske salyp, turǵyndardy jolda saq bolýǵa shaqyrdy, dep habarlaıdy QazAqparat tilshisi.
Aldymen ótken jyl men onyń aldyńǵy jyly velosıped jáne avtokólik júrgizýshilerdiń qatysýymen oryn alǵan jol-kólik oqıǵalaryna qatysty aqparat málim etildi.
«2017 jyly jol-kólik oqıǵasynan 583 velosıped júrgizýshi dene jaraqatyn alsa, al 2018 jyly 523 adam zardap shekti, ıaǵnı jaraqat alý 10%-ǵa azaıǵan. Velosıped júrgizýshiler saldarynan bolǵan jol-kólik oqıǵasynan 2017 jyly 60 adam, ótken jyly 34 adam qaza tapty, tıisinshe ólim jaǵdaıy 43%-ǵa azaıdy. Sondaı-aq, 2017 jyly avtokólik júrgizýshilerdiń kinásinen 443, 2018 jyly 373 oqıǵa tirkeldi. Bul keleńsiz jaǵdaılardyń 20%-ǵa azaıǵanyn kórsetedi. Sonymen qatar, jaıaý júrginshilerdiń kinásinen 2017 jyly - 140, ótken jyly 155 jol apaty tirkeldi, ókinishke oraı bul jerde ósý dınamıkasy bar», - dedi Nur-Sultan qalasy Ákimshilik polıtsııasynyń maıory Baqyt Qurmanǵalıev.
Ákimshilik polıtsııa ókiliniń deregine súıensek, ústimizdegi jyldyń úsh aıynda velosıped júrgizýshilerdiń qatysýymen 119 oqıǵa tirkeldi.
«Jol erejesine kelsek, velosıped jáne moped júrgizýshileri arnaıy velojolmen júrýi tıis, joq bolǵan jaǵdaıda joldyń oń jaq shetimen júredi. Nemese jaıaý júrginshilerge arnalǵan jolmen de júrýge bolady, biraq olarǵa kedergi jasamaýy tıis. Sol sııaqty jasy 15-ke tolmaǵan jasóspirim velosıped jáne mopedpen kóliktiń jolymen júrýge bolmaıdy, olar arnaıy velojolmen nemese jaıaý júrginshiler jolymen júrýi qajet. Jáne de velosıpedshiler top bolyp júrgen jaǵdaıda bir jerde shoǵyrlanýǵa da bolmaıdy, joldyń oń jaq shetinde 10 adamnan bólinip júrýi tıis», - deıdi ol.
Odan bólek, júrgizýshilerdiń velosıped jáne mopedti bir qolmen basqarýyna, birneshe adam minýine tyıym salynady.
«Taǵy bir aıtyp ketetin jaıt, velosıped júrgizýshileri jaıaý júrginshelerge arnalǵan baǵdarshamnan ótkende velosıpedti teýip ótýge bolmaıdy, baǵdarshamnyń jasyl janǵanyn kútip, velosıpedten túsip jaıaý júrip ótýi kerek. Kóptegen jol-kólik oqıǵalary baǵdarshamnan ótý kezinde oryn alady. Sebebi júrgizýshi velosıpedti baǵdarshamnan joǵary jyldamdyqpen teýip ótedi de, jeńil avtokóliktiń qaı jaǵynan kelip qalǵanyn baıqamaı qalady», - dedi B.Qurmanǵalıev.
Nur-Sultan qalasynda velosıped tebý maýsymy resmı túrde osy jyldyń 20 sáýirinen ashyq dep jarııalanady.
Aıta keteıik, búgingi kúni qalada jalpy uzyndyǵy 54 shaqyrymdy quraıtyn velosıped joly bar. Onyń 9,5 shaqyrymy Trıatlon saıabaǵynda, 2,5 shaqyrymy Botanıkalyq baqta, 4 shaqyrymy shańǵy tebý tas jolynda jáne 4 shaqyrymy «Jeruıyq» saıabaǵynda ornalasqan. Odan bólek, qalalyq Ortalyq saıabaqtan bastalatyn 11 shaqyrymdyq velosıped joly EKSPO aýmaǵyna deıin aparady. Sol sııaqty taǵy 23 shaqyrym qala irgesindegi Ilınka aýylanan Qosshy eldi mekenine deıin jalǵasady.
