Velosıped, tońazytqysh, smartfon: Almatyda vaktsına alǵandar arasynda baǵaly syılyqtar oınatylady

ALMATY. QazAqparat - Jetisý aýdanynyń ákimi Gúlnar Kókebaeva Instagram paraqshasynda COVID-19 vaktsınasynyń birinshi komponentin alǵandar arasynda utys oıyny bastalǵanyn jazdy, dep habarlaıdy QazAqparat tilshisi.

«Qurmetti Jetisý aýdanynyń turǵyndary! COVID -19 vaktsınasynyń alǵashqy komponentin salatyn adamdardyń arasynda lotereıa utys oıyny taǵy da ótetinin qýana habarlaımyz. Lotereıaǵa qatysý úshin sizge 29 mamyrdan bastap 4 maýsymǵa deıin Jetisý aýdanynyń vaktsınatsııa ortalyqtaryna vaktsınanyń birinshi komponentin alý qajet. Qorytyndy 5 maýsym, senbi kúni shyǵady» dep jazdy aýdan ákimi.

Atap ótetin jaıt, jeńimpaz jalǵyz emes, 21 adam bolatyndyqtan halyqtyń qatysýǵa degen yntasy zor.

Vaktsına saldyrǵandar arasynda Samsung Galaxy S21 telefony, sonymen qatar Samsung A32 smartfony, Samsung Galaxy Buds live qulaqqaby, tońazytqysh, taý velosıpedi sekildi 5 qosymsha syı, budan bólek 16 yntalandyrý syılyǵy oınatylady.

Bas júlde - Samsung Galaxy S21.

Utys oıyny 5 maýsym saǵat 12:00-de tikeleı efırde Gúlnar Kókebaevanyń Instagram paraqshasynda ótedi.