Velosıped sportynan Astanadaǵy UCI Álem chempıonatyna 32 eldiń sportshylary qatysady
ASTANA. QazAqparat - 19 - 23 tamyz aralyǵynda Astanadaǵy «Saryarqa» velotreginde velosıped sportynan jasóspirimder arasyndaǵy UCI Álem chempıonatyna 32 elden 200-den astam sportshy qatysady. Bul týraly búgin elordada ótken baspasóz máslıhatynda málim boldy.
Atap aıtqanda, álemdik birinshilikte 19 medal jıyntyǵy sarapqa salynyp, onyń toǵyzy qyzdar arasyndaǵy jarystarǵa arnalyp otyr. Jasóspirimder 1 myń metrlik gıt, keırın, sprınt, komandalyq sprınt, komandalyq qýǵyndaý jarysy, jekeleı jarys, toptyq jarys sekildi dodalarda baqtaryn synap kóredi. Belgili bolǵandaı, Qazaqstan quramasynyń namysyn Vadım Onışýk, Edýard Rozenberg, Tımýr Qýat, Islam Ýsmanov, Maksım Naletov, Asylhan Turar, Vladımır Tsoı, Sergeı Shatovkın, sondaı-aq qyzdar arasynda Janerke Sanaqbaeva, Valerııa Tıhova, Nadejda Geneleva, Darıa Goncharova jáne basqa sportshylar qorǵaıtyn bolady. Jasóspirimder arasyndaǵy trekte velosıped sportynan álem chempıonatynyń dırektory Nıls Kannegıterdiń sózine qaraǵanda, «Saryarqa» velotreginde álemdik dodalardy ótkizý úshin barlyq qajetti jaǵdaılar jasalǵan. Osy oraıda ol aldaǵy ýaqytta da aıtýly jarystardy uıymdastyrý baǵytynda Astananyń sporttyq nysandary eskeriletinin atap ótti.
