Velosıped mingen qarııa Nur-Sultannan Petropavlǵa keldi
PETROPAVL. QazAqparat – Petropavl turǵyny 66 jastaǵy Qazybek Bekeev 500-den astam shaqyrymdy velosıpedpen júrip ótti, dep habarlaıdy QazAqparat tilshisi.
Qazybek Bekeevtiń alys joldy qos dóńgelekti kólikpen baǵyndyrýyna Nur-Sultan qalasyna velosıpedke bergen tapsyrysy sebep bolǵan.
«Karantınge baılanysty 65 jastan asqandarǵa shekteý bar ǵoı. Sol sebepti qoǵamdyq kólik – poıyzǵa minbeıin, erejeni buzbaıyn dep jańa velosıpedimdi ózim minip kelýge sheshim qabyldadym. Mamyrdan bastap 2-3 aı jattyqtym. Birinshi kúni 260 shaqyrymdy 8 saǵatta júrip óttim, ózim tań qaldym. Bári Allanyń qolynda. Ári jol da jaqsy. Býrabaıda toqtap, dem alyp, ekinshi kúni 10 saǵat júrip Petropavlǵa jettim», - deıdi Petropavl turǵyny.
Qazybek ata balalarynyń bolashaǵy úshin 1997 jyly aýyldan qalaǵa kóshken. Tórt qyzy men eki ulyn aıaqqa turǵyzý úshin túrli jumys istegen. Búginde beınetiniń zeınetin kórip, olardan nemere-jıen súıip otyr. Qarııanyń pikirinshe, er adam «qolymnan kelmeıdi, bilmeımin» dep aıtpaýy kerek. Sol úshin osydan on jyl buryn sportqa den qoıǵan eken.
«Sportpen aınalysýǵa eshqashan da kesh emes. Aýylda óstim. Tek 55-56 jasymda ǵana bastadym. Basynda densaýlyǵym úshin júgirýdi qolǵa aldym. Keıin ózimdi synap dodalarǵa qatysa bastadym. Nátıjesiz emes, marafondarda jastardy artqa tastaıtyn boldym. 60 jasymda sporttyń osy túrine kásibı túrde den qoıdym», - deıdi Qazybek Bekeev.
2012 jyldan beri ol halyqaralyq marafondarǵa qatysyp júr. Nátıjesiz de emes. Túrkııada 65 myń adam qatysqan baıraqty básekede ol óz jasyndaǵylardyń ishinde segizinshi keldi. Sol joly ol 45 shaqyrymdy baǵyndyrǵan edi. Al 2 jyldan keıin Ombyda ótken halyqaralyq marafonda Qazybek Bekeev 21 shaqyrymdy júgirip ótip, ekinshi oryndy jeńip aldy.
«2018 jyly Elordadaǵy 34 qabatqa júgirip shyǵýdan jarys bolatynyn kezdeısoq estip qaldym. Daıyndalýǵa ýaqyt joq. Ótinish berip, ekinshi kúni qatystym. Bul marafon júgirý emes, óz qıyndyǵy bar. Sonda da jastarǵa des bermedim. Olardy artqa qaldyryp, bas júlde 100 myń teńgeni jeńip aldym», - deıdi qarııa.
Endi Qazybek Bekeev karantınniń aıaqtalyp, jaǵdaıdyń qalypqa kelýin kútip júr. Ol ózi sııaqty 15-20 adammen velosıpedke otyryp, Ispanııaǵa baryp kelýdi josparlap otyr.
