Veloshabandoz Mıgel Anhel Lopes «Astana» sapynda qalady
ASTANA. QazAqparat - Kolýmbııalyq veloshabandoz Mıgel Anhel Lopes «Astana» álimdik týrynyń komandasynda 2020 jyldyń sońyna deıin óner kórsetýdi jalǵastyrady, dep habarlaıdy «QazAqparat» HAA Astana Pro Team saıtyna silteme jasap.
2018 jyldyń maýsymyna jasalǵan kelisimshartqa qaramastan, komanda basshylyǵy men sportshy taǵy eki jylǵa (2019 jáne 2020) arnalǵan jańa kelisimge qol qoıdy.
«Aldaǵy úsh maýsymda «Astana» komandasynda bolamyn, qýanyshymda shek joq. Men ózimniń kásibı mansabymdy osynda bastadym, osy ýaqyt ishinde basshylyq, sport dırektorlary, komandadaǵy oıynshylar tarapynan qoldaýǵa ıe bolyp kelemin», - dedi Mıgel Anhel Lopes.
23 jastaǵy veloshabandoz qazaqstandyq komandanyń quramynda 2015 jyldan beri óner kórsetip keledi. Ótken úsh maýsymda alǵan jaraqatyna qaramastan keremet nátıjelerge qol jetkizdi.
«Biz úshin Mıgel Anhel Lopes - jap-jas bolǵanyna qaramastan, komandadaǵy kóshbasshylardyń biri. Oǵan bireýge birdeńe dáleldeýdiń qajeti joq - tek tájirıbe jınaqtap, kásibı veloshabandoz retinde damyp, bıik shyńdardy baǵyndyrsa bolǵany», - dedi komandanyń bas menedjeri Aleksandr Vınokýrov.
