Veloshabandoz Artem Zaharov Rıo Olımpıadasyna joldama aldy
ASTANA. QazAqparat - Velotrek boıynshat Qazaqstan ulttyq quramasynyń kóshbasshysy Artem Zaharov kópsaıysta Rıo-de-Janeıroda ótetin jazǵy Olımpıadaǵa joldama jeńip aldy.
Qazaqstan Velosporty federatsııasynyń baspasóz qyzmetinen atap ótkendeı, velosportta Olımpıada oıyndaryna tikeleı joldamalar joq, al irikteý kvalıfıkatsııalyq júıege sáıkes júzege asyrylady.
Sońǵy eki maýsym boıy qazaqstandyqtardy túrli deńgeıdegi halyqaralyq jarystar, sonyń ishinde Azııa jáne Álem kýboktarynda joǵary nátıjelerimen qýantqan Artem Zaharov Olımpıadanyń úzdik 18 sportshysynyń reıtıngine kirdi. Osylaısha, qazaqstandyq trekshiler Afıny-2004 olımpıadasynan beri alǵash ret basty dodaǵa qatyspaq.
Búginde Qazaqstannyń qorjynynda 50 olımpıadalyq lıtsenzııa bar ekenin atap óteıik.
2016 jylǵy Jazǵy Olımpıada oıyndary 5-21 tamyz kúnderi Rıo-de-Janeıroda (Brazılııa) ótedi.
Artem Zaharov - omnıýmda 2013 jylǵy Azııa chempıony, Azııa kýbogynyń ıegeri, 2013, 2016 jylǵy Álem kýbogynyń qola júldegeri, Azııa chempıonatynyń qola jáne kúmis júldegeri.
