Velosaıahatshy Ahmet Baıtursynulynyń 150 jyldyǵyna oraı Ystanbulǵa deıin sherý jasamaqshy

NUR-SULTAN. QazAqparat – Belgili jýrnalıst, «Tolyq adam jáne 4 damý» jobasynyń, «Abaı arqyly aǵylshynsha úıren», «Ǵylym tap - Find Science» ádistemeleriniń avtory, oqytýshy-aýdarmashy, velosaıahatshy Ernat Melsuly jyldyń basynda Ahmet Baıtursynulynyń 150 jyldyǵyna arnap bastaǵan velosherýdi ári qaraı jalǵastyryp, Torǵaı óńirinen Túrkııanyń Ystanbul qalasynda deıin velosıpedpen saıahat jasamaqshy, dep habarlaıdy QazAqparat tilshisi.

Bastama avtory qazir «Kókqasqasyn» (saıahatqa arnalǵan velosıpedteriniń birine osyndaı at qoıypty) jabdyqtap, óziniń de babyn shyńdap júr.

«Ahmet Baıtursynulynyń týǵanyna 150 jyl tolýyna arnalǵan halyqaralyq velosherýdi memleket ustazynyń kindik qany tamǵan jer – Aqkól, Sarytúbekten týǵan kúnine qaraı 4 qyrkúıekte bastaımyn. Dál týǵan kúni – 5 qyrkúıekte Ahmet atamyzdyń mereıjasyna arnalǵan negizgi is-sharalar ótetin aýdan ortalyǵy Torǵaıda jalǵastyryp, Amantoǵaı, Áýlıekól, Qostanaı, Aqtóbe, Bestamaq, Atyraý, Aqtaý arqyly júrip, Quryq teńiz aılaǵyna baryp toqtaımyn. Ol jerden kemege otyryp, Kaspıı teńizinen ótip, Bakýde temiratyma qaıtadan er salamyn. Ári qaraı Gánjá qalasyna soǵyp, Grýzııa astanasy Tbılısıden Kýtaısı arqyly Qara teńiz jaǵasyndaǵy Batýmı jáne Túrkııanyń Rıze, Trabzon, Ordý, Samsýnnan ótip, Ankaraǵa jetsem deımin. Atatúrikke táý etip, velosherýdi Ystanbuldaǵy Mustafa Óztúrik aǵamyzdyń zıratynda túıindesem degen nıetim bar», - deıdi velosaıahatshy.

Óziniń jobalaýynsha, Qazaqstannan bólek 3 memlekettiń aýmaǵynda ótetin saparǵa 55 kún ketýi múmkin.

«Velosherýge jalǵyz qatysamyn. Solo tásilinde ótedi. 2 aıǵa sozylatyndyqtan, árkimniń ýaqyt, qarjy, jumys, otbasy jaǵynan múmkindigi bola bermeıdi. 55 kúnde 5555 shaqyrymdy eńsersem dep oılaımyn. Ahmet atamyzdy ulyqtaýdan basqa elimiz ben Ázerbaıjan, Grýzııa, Túrkııamen arada dıplomatııalyq qarym-qatynastyń ornaǵanyna 30 jyl tolý mereıtoıyn nasıhattaýǵa da úles qossam degen nıetim bar. Budan basqa, Baký, Tbılısı, Ankara, Stambuldaǵy Abaı Qunanbaıulynyń atyndaǵy kóshelerdi kózben kórip, eskertkishterine taǵzym etý de - basty maqsatym. Osy qalalarda Qazaqstan elshiligi arqyly kezdesý-suhbat jasap, aǵylshyn tilinde hakim Abaıdyń «Tolyq adam» ıdeıasyn nasıhattasam deımin», - dedi Ernat Melsuly.

Osynsha kúrdeli saparǵa kim demeýshilik jasaıtynyn suraǵan edik.

«Ázirge demeýshilik surap eshkimge shyqqan joqpyn», -dep qysqa qaıyrdy.

Buǵan deıin shetel arhıvterinen Ahmet Baıtursynuly men «Alash» qaıratkerleri týraly derekter izdestirilip jatqanyn jazǵan edik.