Velomarafonshy Ahmet Baıtursynulynyń aýylynan Ystanbulǵa deıin jetpek
Velomarafon Ahmet Baıtursynulynyń 150 jyldyǵyna arnalyp otyr. Ol qoǵam qaıratkeriniń týǵan kúninde jáne onyń týǵan jerinde bastalady. Atap aıtqanda, 5 qyrkúıekte Aqkól aýylynda bastalyp, Ystanbulda aıaqtalady. Ernat 55 kúnde 5555 shaqyrymdy júrip ótpek.
«Bul saparǵa jaz boıy daıyndaldym. 700 myń teńgege jańa velosıped satyp aldym, ol jeńil ári jyldam. Sondaı-aq tıimdilik pen jyldamdyqty arttyrýǵa kómektesetin velosıped aıaq kıimin satyp aldym. Ózimmen birge alyp júrgen júktiń jalpy salmaǵy 30 kg quraıdy», – dedi velomarafonshy.
Ernat elimizdiń tórt oblysynyń (Qostanaı, Aqtóbe, Atyraý, Mańǵystaý) jáne Ázerbaıjan, Grýzııa, Túrkııa aýmaqtarymen júrip ótedi.
«Velosıpedpen Mańǵystaý oblysyna jetemin. Ol jerden qurǵaq port arqyly Bakýge deıin jol tartamyn. Sodan keıin velosıpedpen Ystanbulǵa qaraı júremin. Jolda baılanys nashar, biraq múmkindigime qaraı eńserilgen jol men bolǵan jerler týraly ózimniń áleýmettik jelilerdegi paraqshalarymda jazatyn bolamyn», – deıdi ol.
Eki aılyq marafonnyń negizgi maqsaty ult ustazy Ahmet Baıtursynulynyń shyǵarmashylyǵyn, Abaı Qunanbaıulynyń Tolyq Adam tujyrymdamasyn dáripteý bolyp tabylady. Sondaı-aq velojarys Qazaqstan men Ázerbaıjan, Grýzııa men Túrkııa arasyndaǵy dıplomatııalyq qatynastardyń ornaǵanyna 30 jyl tolýyna oraılastyrylǵan.
Eske sala keteıik, osy jyldyń aqpan aıynda Ernat 9 saǵat 56 mınýt ishinde 150 shaqyrymdy velosıpedpen júrip ótken bolatyn. Velosherý Qazaqstannyń rekordtar kitabyna alǵashqy qysqy velomarafon retinde endi.
