Vegetatsııalyq kezeń: Qyzylorda oblysynda sý resýrstaryn basqarý sharalary kúsheıtildi

QYZYLORDA. KAZINFORM — Qyzylorda oblysynyń ákimi Nurlybek Nálibaev sýmen qamtamasyz etýdiń shekteýli jaǵdaıynda vegetatsııalyq kezeńdi turaqty ótkizýge baǵyttalǵan óńirde atqarylyp jatqan sharalar týraly baıandady. Bul týraly Úkimet málimdedi.

Úkimet tapsyrmasy boıynsha jáne tıisti mınıstrlikter arqyly úılestire otyryp, egindik sýdy tıimdi paıdalanýǵa múmkindik beretin sheshimder engizilip otyr. 

— Barlyq aýdanda arnaıy jumys toptary qurylyp, túsindirme jumystary júrgizilýde, sýdy tıimdi paıdalaný qatań baqylaýǵa alyndy. Magıstraldy jáne sharýashylyqaralyq arnalar arqyly sý berýdi kezektestirý kestesi bekitildi, jumys kestege sáıkes júrip jatyr. Oblysta sorǵy qondyrǵylary daıyndaldy. Qosymsha 165 sorǵy qondyrǵysyn alý úshin Sý resýrstary jáne ırrıgatsııa mınıstrligine ótinim berildi, —dedi ol. 

Bıyl Qyzylorda oblysynda jalpy 189 myń 300 gektarǵa aýyl sharýashylyǵy daqyldary egildi. Onyń 92,9 myń gektary dándi daqyldar, 5,7 myń gektary maıly daqyldar, 73,3 myń gektary mal azyqtyq daqyldar, 17,4 myń gektary kartop, kókónis, baqsha daqyldary. Kúrish alqaptary 4,7 myń gektarǵa qysqartylyp, onyń ornyna sýdy az qajet etetin mal azyqtyq jáne maıly daqyl alqaptary ulǵaıtyldy.

Buǵan deıin habarlanǵandaı, Qazaqstanda shamamen 85 myń gektar jer sý únemdeý tehnologııasymen sýarylady.