Vedomstvolyq nagradalardy bir izge túsirip, zańnamaǵa sáıkestendirý qajet - M.Qul-Muhammed

Bul týraly búgin Aqordada ótken Vedomstvolyq nagradalar jónindegi geraldıkalyq komıssııanyń otyrysynda QR Memlekettik hatshysy Muhtar Qul-Muhammed aıtty.

Alqaly jıyndy ashyp, komıssııa múshelerin kúni keshe ótken Astana kúnimen quttyqtaǵan Memlekettik hatshy: «Búkil elimiz osy úlken merekege zor daıyndyqpen keldi. Astanada, barlyq oblys ortalyqtarynda Astana kúni, Qazaqstannyń elordasynyń kúni keń kólemde atap ótildi. Osy mereke qutty bolsyn degim keledi», - dedi.

Osydan keıin komıssııanyń kún tártibine toqtalǵan M.Qul-Muhammedtiń aıtýynsha, respýblıkamyzdaǵy barlyq memlekettik organdardyń jáne ulttyq kompanııalardyń, túrli vedomstvolardyń óziniń vedomstvolyq nagradalary bolady. Al osy nagradalardyń barlyǵyn bir izge túsirý, olardyń elimizdiń zańnamasyna sáıkestigin qaraý jáne olardyń sıpattamasyn belgileý geraldıkalyq komıssııanyń quziretine jatady.

Bul rette, Elbasynyń Jarlyǵyna sáıkes 14 memlekettik organnyń 43 medali, 34 tósbelgisi belgilengendigin atap ótken ol: «Ókinishke oraı, solardyń barlyǵy áli kúnge deıin bireýi qurmetti degen atpen, ekinshisi úzdik degen atpen, úshinshisi basqada ataýlarmen belgilenip kele jatyr. Olardyń barlyǵyn bir izge túsirip, zańnamaǵa sáıkestendirý osy komıssııanyń negizgi mindeti bolyp tabylady. Sondyqtan biz búgingi kún tártibine birneshe máseleni shyǵaryp otyrmyz. Ol memlekettik organdardyń vedomstvolyq nagradalaryna qatysty kelip túsken usynystar», - dedi.