Vedomstvolyq marapattardyń orynsyz taratylý deregi tirkelmedi – Mádenıet mınıstrligi

ASTANA. KAZINFORM – Vedomstvolyq marapattardyń orynsyz taratylý deregi tirkelgen joq. Bul týraly Mádenıet jáne aqparat mınıstrliginen málim etti.

- Mınıstrlik Memlekettik rámizder men vedomstvolyq jáne olarǵa teńestirilgen ózge de nagradalar geraldıkasy máseleleri jónindegi respýblıkalyq komıssııanyń (budan ári – Respýblıkalyq komıssııa) jumys organy retinde turaqty túrde qoldanystaǵy barlyq vedomstvolyq nagradalarǵa taldaý jumystaryn júrgizedi. Nátıjesi respýblıkalyq komıssııa otyrysynda talqylanady. Jalpy vedomstvolyq nagradalar qyzmettik mindetterin úlgili oryndaǵany, shyǵarmashylyq belsendiligi, minsiz qyzmeti, eńbek qyzmetinde basqa da jetistikteri men ózge de sińirgen eńbegi úshin qyzmetkerlerdiń, jumyskerlerdiń jáne ózge de tulǵalardyń eńbekterin kótermeleý jáne yntalandyrý nysandarynyń biri. Sol sebepten vedomstvolyq marapattardyń orynsyz taratylýy týraly derek tirkelmegenin málimdeımiz, - dedi mınıstrlikten agenttiktiń saýalyna oraı.

Osy jyldyń sońyna qaraı «Vedomstvolyq nagradalardyń aqparattyq júıesi» platformasy pılottyq rejımde paıdalanýǵa beriletinin jazǵan edik.

Esterińizge sala ketsek, bıyl Býrabaıda ótken Ulttyq quryltaıdyń 4-otyrysynda Memleket basshysy Qasym-Jomart Toqaev sońǵy jyldary memlekettik nagradalar máselesi qaıta qaralyp, bir júıege túsirilgenin aıtqan edi. 

- Endi vedomstvolyq marapattardy retke keltirý qajet. Memlekettik organdar bul jumysty nazardan tys qaldyrdy. Naqty ereje joq, bárine ortaq málimetter qory da joq. Sonyń kesirinen keıbir marapattar orynsyz taratylyp jatyr. Tipti, bir memlekettik organnyń tósbelgisin bir adam birneshe ret alǵan jaıttar da kezdesedi. Mekemelik marapat – naǵyz bilikti mamandarǵa ǵana beriletin, sol arqyly kásibı mártebeni kóteretin mańyzdy nagrada. Buǵan beı-jaı qaraýǵa bolmaıdy, - degen bolatyn Prezıdent.