Vedomstvoaralyq memlekettik komıssııa sý tasqyny kezeńine daıyndyqty talqylady

NUR-SULTAN. QazAqparat - QR Premer-Mınıstriniń orynbasary Roman Sklıardyń basshylyǵymen «Basqarý organdarynyń, Azamattyq qorǵanys Memlekettik júıesiniń kúshteri men quraldarynyń sý tasqyny kezeńine daıyndyǵy týraly» kún tártibimen tótenshe jaǵdaılardyń aldyn alý jáne olardy joıý jónindegi Vedomstvoaralyq memlekettik komıssııanyń otyrysy ótti, dep jazady primeminister.kz.

QR ІІM TJK daǵdarys jaǵdaıyndaǵy Basqarý ortalyǵynda ótkizilgen otyrysqa ortalyq memlekettik jáne jergilikti atqarýshy organdardyń basshylary qatysty.

«Qazgıdromet» RMK, TJ Komıteti, Sý resýrstary komıtetiniń basshylary boljamdar, sý tasqyny kezeńine daıyndyq, gıdrotehnıkalyq qurylystardyń sýdy qabyldaý jáne apatsyz ótkizýge tehnıkalyq daıyndyǵy týraly baıandady.

«2017-2020 jyldarǵa arnalǵan sý tasqyny qateriniń aldyn alý jáne joıý boıynsha sharalar kesheni» jol kartasynyń is-sharalaryn iske asyrý kezinde 724 eldi mekenge qaýip-qaterler azaıtylǵany atap ótildi. 2017-2019 jyldar aralyǵynda 515 km qorǵaý bógetteri men qorǵanys bilikteri salyndy, 508,1 km qorǵaý qurylystary jóndeldi, 537,1 km sý tasqyny qaýpi bar ózen arnalaryndaǵy jaǵalaýdy bekitý, túbin tereńdetý jáne túzetý boıynsha jumystar júrgizildi.

Sý tasqyny jaǵdaıynyń kúrdelený yqtımalynyń aldyn alý úshin 9 myńnan astam adam, 1730 birlik tehnıkadan turatyn apattyq-qutqarý bólimsheleriniń kúshteri men quraldarynyń toby quryldy. Kúshter men quraldardyń qosymsha rezervtik toptary, Ulttyq ulannyń áskerı qyzmetkerleri men tehnıkasy daıyndaldy. Halyqty habardar etý máseleleri pysyqtaldy.

Sý tasqyny kezeńiniń qaýipsiz ótýi boıynsha atqarylyp jatqan is-sharalar týraly Nur-Sultan q., Aqmola, Shyǵys Qazaqstan, Soltústik Qazaqstan, Qaraǵandy, Qostanaı, Pavlodar oblystary ákimderiniń orynbasarlary tyńdaldy.

Premer-Mınıstrdiń orynbasary Roman Sklıar sý tasqynyna jol bermeý úshin aldyn ala sharalar qabyldaý jóninde birqatar naqty tapsyrmalar berdi.