Vedomstvoaralyq komıssııa: Birqatar oblystaǵy turaqtandyrý qoryndaǵy dári kólemi ulǵaıtylady
NUR-SULTAN. QazAqparat - QR Premer-Mınıstriniń orynbasary E. Toǵjanovtyń tóraǵalyǵymen ótken Vedomstvoaralyq komıssııanyń otyrysynda Memleket basshysynyń tapsyrmalaryn oryndaý boıynsha birqatar sheshim qabyldady, dep habarlaıdy QazAqparat primeminister.kz-ke silteme jasap.
«Shymkent qalasy, Aqmola, Aqtóbe jáne Batys Qazaqstan oblystarynyń ákimdikterine turaqtandyrý qorlaryndaǵy dárilik zattar rezerviniń kólemin ulǵaıtý tapsyryldy», delingen habarlamada.
Eske sala ketsek, Memleket basshysy Qasym-Jomart Toqaev koronavırýs indetiniń ekinshi kezeńine daıyndyq máseleleri boıynsha keńeste Úkimet múshelerine dári-dármek boıynsha turaqtandyrý qorlaryn belgilengen normatıvke sáıkes jasaqtaýdy tapsyrǵan edi.
«Biz jaz aılarynda dári-dármek tapshylyǵyn aıqyn sezindik. Meniń tapsyrmam boıynsha naqty jumys atqaryldy. Atap aıtqanda, eki aıǵa jetetin qor jasaqtalyp, eń qajetti degen dári-dármektiń tizimi ulǵaıtyldy. Ony syrttan ákelý jáne tirkeý tártibi jeńildetildi. Biraq, óńirlerde dári-dármekterdi turaqtandyrý qorlarynyń kólemi jáne daıyndyq jumystary birkelki emes», degen edi Prezıdent.
